|
نامەکانی سامان شاسوار
ساڵی 1982
کە " کاک جەلالی مەلا مستەفا" بریندار کرا، ڕێکخراوی سلێمانی کۆمەڵە لە ڕێگەی " گۆرانی حسەینە فەنی" منیان ڕووبەڕووی "کاک سامان شاسوار" کردەوە.
کاک سامان کۆمەڵێک نامەی هاوکاری هێنا بۆ پیتاک کۆکردنەوە لە دەوڵەمەند و کاسبکارانی سلێمانی.
نامەیەکیان " بۆ حەمە سەعید عەنبەری برای حەمە حەمە ساڵح عەنبەری" پارێزگاری کۆنی سلێمانی بوو، کە بڕی " 2000" دیناری سویسری بوو.
دەمانزانی ماڵی کاک حەمە سەعید لە عەقاریە ، بەڵام ڕێک نەماندەزانی له کوێیە؟
نامەکه بە من بوو، چوومە دوکانی " عەنبەر خاتوون" لە عەقاری کۆمەڵێ کەس دانیشتبوو.
پرسیم : ماڵی کاک حەمە سەعید لە کوێیە؟
هەموو قڕوقەپیان کرد.
ووتم: تەنیا ئیشێکمان پێیەتی و نێتی خراپمان نیە.
پیاوێکی پیر بە تووڕە بوونەوە هەستا و ووتی منم.
ووتم: بەڕێز تا دەرەوە وەرە بێ زەحمەت.
هەموو گەنجەکان شوێنم کەوتن.
ووتم: هیچ کێشەیەک نیه، تەنیا نامەیەکی بۆ هاتووە و دەیدەمێ.
ماڵەکەی لەو بەر دوکانەکەوە بوو.
کە گەیشتینە بەردەم ماڵی خۆیان.
ووتم : نامەیەکی یەکێتیم بۆ هێناویت بۆ هاوکاری.
ووتی: یە کێتی ناناسم.
ووتم: نامەکەم هێناوە و دەشبێ وەریبگریت.
ئێمە لەم قسانەدا بووین، ئیڤایەک ئینزباتی عەسکەری لەبەردەم دوکانەکە وەستان.
سەیرێکی کاک سامانم کرد کە لەو بەرەوە چاودێری دەکردین ، و بە ئیشارەت پێم ووت ڕابکەین؟
ئەو بە ئیشارەتی پەنجە ووتی ئۆکەیە و ڕامەکە.
نامەکەم دا بە کاک حەمە سەعید.
لەگەڵ کاک سامان دەگەڕاینەوە بۆ ناوبازاڕ.
کە نزیک دایرەی ئەمنە کۆنەکە بووینەوە، کاک سامان هەندێ فیشەکی دەمانچەی دەرکرد و تەزبێحانەی پێدەکرد.
جارێکیان" کاک سامان" هات بۆ ماڵمان و دەمانچەیەکی مەکاریۆفی لا بە جێهێشتم، لە کاتی فێرکردن و کردنەوەی دەمانچەکە لە ژوورەکەی خۆم کە لە قاتی سەرەوە بوو، فیشەکێکی لە دەست دەرچوو، بە لای سەرمدا گیزەی کرد و چووە ناو گەچی دیوارەکە .
ئەو کاتە بۆ گەورەکردنی ئەم شۆڕشە دەیان گەنجی سلێمانی بە ڕۆحی خۆیان سواڵ و پیتاکیان بۆ کۆدەکردوه.
وەختێکیش بوه خاوەنی بودجە و نەوت و دابەشکردنی پۆست و پلە و پایە، کەسیان بیر نەما.
هەزاران دەفتەرە دۆلاری چاوسەوزیان بۆ خۆیان و خزم و هاوڕێکانیان دزی .
شێرزاد عەزیز
مالمۆ
https://www.malmokurd.com/agadary-35811-3
بهروار: 29/07/2026
143 جار خوێندراوهتهوه
|