|
ڕێگاکانی گەیشتن بە خودا
گەورەی عاریفان (شیبلی) کوڕێکی هەبوو مرد ، خێزانی شیبلی بۆ مەرگی کوڕەکەی پرچی خۆی بڕی ، شیبلی کە ڕیشێکی درێژی هەبوو بەدوایدا ، هەمووی تاشی ، لێیان پرسی قوربان ئەمە چ کارێکە ؟
فەرمووی ، ئەو ژنەم بۆ (مەحبووبی مەفقود) بۆ خۆشەویستە ونبووەکەی پرچی بڕی ، من بۆ (مەحبووبی مەوجود) خۆشەویستە هەبووەکەم چۆن ریشم نەتاشم !!
...........
خودا مەحبووبی مەوجودە ، لە رێگەی دروستکراوەکانییەوە ئامادەیە ، دەهێنێت بڕێک لە سفرە و خوانەکانمان لێی ببڕین بۆ ئەوانی تر ،
ئەم هەسارەیە بەبێ ئاژەڵەکان ، بەبێ شۆڕەبی و نیلوفەرەکان ، بەبێ دەنگی کوکوختی و پاسارییەکان ، بەبێ تریفەی مانگ و شەوقی کانییەکان ، هەسارەیەکی تاریک و ڕەق و ترسناکە.
ڕاوکەر کە دەچێتە کەژ و شاخان نازانێت چی دەهێنێتەوە ، سوێسکە و پۆڕ ، یان ئاسک و ماسی ، پاڵەوانیش کە دەچێتە شەڕ نازانێت چی دەهێنێتەوە ، سەری دوژمنەکەی ، یان تابووتەکەی خۆی.
مرۆڤیش کە بەیانیان هەڵدەستێت نازانێت ئێوارە چی دەچنێتەوە ، حازر یان غائیب ، مەفقود یان مەوجود ، عادەت یان عیبادەت ؟
.............
ئاڤارییەکان ، ژن و ژنخوازی لەگەڵ هەموو نەتەوەیەک دەکەن ، بەڵام تەنها یەک جۆر ژنخوازی ڕەت دەکەنەوە ئەویش ئەوەیە کە ژنەکەت لە دڵەوە خۆش نەوێت .
هەرجۆرە بیروباوەڕ و کارێکت هەیە ئاساییە بەڵام تەنها یەکجۆر بیروباوەڕ ڕەت دەکرێتەوە کە مەوجود و دروستکراوەکانی خودای خۆشنەوێت !
چونکە خۆشەویستی (مەوجود) ئەوانەی کە بەردەستن ، دەتگەیەنێت بە خۆشەویستی (مەفقود) ئەوانەی کە نادیارن،
..............
کورد دەڵێت (لە برسا ئاو ئەکوڵێنێت )
مرۆڤ زۆر جار لە برسێتی دەرونیدا ئازاری زۆر ئەکوڵێنێت ، ئەم شتە بچوکانە ، ئەم دروستکراوانەی خودا ، ئەم چاکە نادیار و نادیدەگیرانە بگرنە باوەش و دەرونتان، ئەوکاتە خوانێک ، ئارامییەک ، سفرەیەک لە دەرونتاندا خۆی ئامادە دەبێت .
(نالی عەجەب بە قودرەتی حیکمەت ئەدا ئەکا
مەعنایی زۆر و گەورە بە لەفزی کەم و بچووک)
مانای گەورە لە شتی بچووکدا هەیە ، هەر وەکو چۆن خۆشەویستی نادیار لە عیشقی دیاردا هەیە.
.....................
بۆ کاک فەزڵی ڕێگایەکی تایبەت هەیە بۆ گەیشتن بەخودا ، بۆ ئەو تیشێت خەتخەتەی لەلای پایەکە دانیشتووە ، بەڵێ بۆ ئەویش رێگایەک هەیە 😁، حاجی ڕەزا لە فیلمی (مارملک) دەڵێت (بە ئەندازەی ژمارەی مرۆڤەکان ڕێگای گەیشتن بە خودا هەیە ) خۆ قەرار نییە خودا بەو هەموو میهرەبانیی و گەورەییەوە هەموومان لە شوێنێکدا گیربدات ، کاتێک ئاژەڵێک ، مارێک ، خشۆکێک دەبێت بە داو و تەلبەندی ئێمەوە ، رێگایەک دەرگایەک ، دەلاقەیەکی بۆ دەکەینەوە تا ئەمجارەش بڕوات ، خودا بۆیە ئەوەندە گەورەیە هەشت ملیارد دەلاقە و رێگای هەیە بۆ ئەوەی دەرفەتێکی ترمان بداتێ کە مەوجودە ، نەک مەفقود.
چی لە دڵێکی گەورە و میهرەبان مەوجودترە و چی لە بوغز و ڕق و دڵڕەقی و بێڕەحمی مەفقودتر.
نوقتە سەری دێڕ ...
هێمن عەبدولقادر
به‌روار: 28/11/2025
43 جار خوێندراوه‌ته‌وه
|