|
کێ بە لێدان لە کۆرمۆر دڵخۆشە؟
پێدەچێت بە ئەگەری زۆرەوە، یەکێتیی پەیوەندیی بەو هێرشەوە نەبێت یاخود خۆی ئەنجامی نەدابێت. بۆ ناچارکردنی پارتیی بە سازشکردن، بێگومان یەکێتیی زۆر ڕێگەی دیکەی لەبەردەستن تاقیانبکاتەوە. بەڵام ئەوەی وا دەکات هەندێک گومان بخرێنە سەر یەکێتیی، دەگەڕێتەوە بۆ ئەو لێدوانانەی سەرانی یەکێتیی لە ساتی هەڵبژاردن و دوای هەڵبژاردن بۆ پێکهێنانی حکومەت و بەشداریی پێنەکردنیان. بەشێکیش لەناو پارتی هەن ئەم بابەتە زەقتر دەکەنەوە، بۆ زیاتر قووڵکردنەوەی ناکۆکییەکانی نێوان ئەم دوو حزبە.
بەڵام ئەوەی ڕاستەوخۆ یەکێتیی دەکاتە بەرپرس، بوونی کۆرمۆرە لەژێر کۆنتڕۆڵی یەکێتییدا، بێدەنگیی سەرانی ئەم حزبە لە خستنەڕووی هەندێک سەرەداو ئاشکرای بکات کێ لە پشتی ئەم هێرشەوە بووە. تا ئەو ساتەی یەکێتیی کۆمەڵێک دەرەنجام ئاشکرا نەکات، نەک وەک تاوانبار بەڵکو وەک بەرپرسیار لەم وێرانبوونە دەمێنێتەوە. جا هێزێکی هەرێمیی کردبێتیی (کە گومانی ئێران هەیە) یاخود پرۆکسییەکانی ئێران کردبێتیان وەک حەشدی شەعبی. خۆ ئەگەرێکی دیکەش هەیە کە کەم کەس گومانی بۆ دەچێت: تورکیا. زیانباری گەشەی ئابووریی و ژێرخانی کوردستان، تورکیایە، هەم لە ڕووی ئابوورییەوە هەم لەڕووی ئەو شتەی پێیدەڵێن «ئاساییشی نەتەوەیی».
هەر گەشەیەکی کوردستان، زیانە بۆ ناسنامە، ئابووریی، ئاساییش و ڕەوتی فراوانخوازیی تورکیا. جگە لە کاریگەریی کوردستان لەسەر بیری نەتەوەیی لە باکووری کوردستان. لەم ڕووەوە پێویست بە بەدواداچوونی زیاتر دەکات کە هەم یەکێتیی و هەم پارتیی بە هاوبەشیی کاری بۆ بکەن.
خاڵێکی دیکەش سەرهەڵدانی ئۆپۆزیسیۆنێکی جوێنفرۆشە لە کوردستان، کە بێگومان تووشی داڕمانێکی وەهای ئەخلاقیی و دەروونیی بووە، خۆشحاڵە بەوەی هەموو شتێکی کوردستان تێکبچێت تەنها بۆ ئەوەی بڵێت «من لەسەر حەق بووم» و «حوکمڕانیی بە نەخوێندەوار ناکرێت» و چەندە زیاتر ژێرخانی کوردستان شکست بهێنێت، زیاتر پێیوایە ئایدیۆلۆژیاکەی دەبوژێنێتەوە. ئایدیۆلۆژیا و عەقیدەی ئۆپۆزیسیۆن لەسەر گرەوێکی کوشندە دامەزراوە: حکومەت باش بێت، ئەو دەمرێت، حکومەت خراپ بێت، ئەو دەبوژێتەوە. لەڕووی دەروونشیکارییەوە بڕوانین، لە نەستی ئۆپۆزیسیۆندا ئەو غەریزەیە خۆی مەڵاس داوە: با هەموو شتێک و دەستکەوتێک بکەوێت و بمرێت، بۆ ئەوەی ئیگۆی من بژیت و بتوانم بگەمە پەرلەمان و خوارەوەی کۆمەڵگە.
خاڵێکی دیکەش ئەوەیە کە بەشێکی زۆری کورد بەوە ڕانەهاتووە بۆ بەدەستهێنانی خزمەتگوزارییەک، دەبێت تێچووەکەی بدات. ئامادەیە لە تاریکییدا بژیت، پارەیەکی زیاتر بە هاتوهاواری مۆلیدەکان بدات، بەڵام نیوەی ئەم پارەیە نەدات بە حکومەت. گەورەترین هەڵەی حکومەت بریتی بوو لە بێپلانیی لە بەمووچەخۆرکردن و تەمەڵکردنی کۆمەڵگەی کوردستان. ڕاستکردنەوەی ئەم هەڵەیە هەم لەڕووی دامەزراوەییەوە و هەم ئامادەکردنی کولتووریی و سایکۆلۆژیانەی کورد بۆ کۆمەڵگەی دوای مووچەخۆریی، کاتێکی زۆری دەوێت. ڕەنگە ١٠ بۆ ٢٠ ساڵی دیکەش کات ببات.
پێشڕەو محەمەد
بەرلین
به‌روار: 27/11/2025
46 جار خوێندراوه‌ته‌وه
|