|
پێشمەرگەی دێرین و دزەکانی پیتزا🇸🇪
چەند ساڵێک لەمەوپێش
،خەڵکی یەکێ لە دێهاتەکانی دەوروبەری شار بوو
پێشمەرگەیەکی چاونەترس ، لەشسوک وگوڕج و گۆڵ بوو، لەزۆربەی شەڕەکانی کوردستانا بەشداربوو، دێ نەمابوو سەری پیانەکاو شاخ نەمابوو پیا هەڵنەگەڕێ، دەردەسەری ژیان و تێکچونی باری ئابوری کوردستان وای لەمیش کرد، لەکۆتایی نەوەدەکانا ووڵات جێبهێڵێ و ڕوو لە دەوڵەتە ئەوروپییەکان بکا، لە سوید گیرسایەوەو لەیەکێک لەشارەکانی ئێرە جێگیر بوو.
بەلەشولار لاوازو باریک بوو، بەڵام قیرچسمەو گیر بوو، لە چێشتخانەیەکی بچوکا ئیشی دەستکەوت و دەستی بەکارکردن کرد ، خاوەنی چێشتخانەکە زوو ناسی، بڕوای بەتواناکانی ئەم هەبوو، ئەیزانی کەسێکی دەستپاک، زرت و چالاک و ئیشکەرە، بەدەستوپل و بەرائەتەکەی دەم و چاویا دیاربوو، دوای ماوەیەکی کەم کرایە وەستای پیتزا، ماڵەکەی نزیک چێشتخانەکەبوو،لەناوەوەو لەدەرەوەی چێشتخانەکە خاوەنەکەی ،سێ چوار کامێرای جێگیر کرد ، لەبەر ئەوەی لەو نزیکانە دەژیا خاوەن کارەکە، کامێراکانی بە موبایلەکەی ئەمەوە بەست، تا گەر شتێک ڕوودا ئەم زوو فریا کەوێ.
ئێوارەیەکی هاوین دوای ئیشکردن ،لەماڵەوە ڕاکشابوو تەماشای تێڤێی کردبوو، موبایلەکەی بە تێڤێکەوە بەستبوو، لەپڕێکا بینیبووی ،کەسێک لەبەردەمی چێشتخانەکەیا لەپاڵ ئوتومبیلێکا وەستاوەو سێ کەسی تریش خۆیانخزانۆتە ناو چێشتخانەکەوە، خەریکی قاسەکردنەوەو بردنی شتومەکەکانن، ئەمیش وەک شێت ڕادەپەڕێ ،پەلاماری بۆرییەکی کوورت دەدا ، بێئەوەی خۆی بگوڕێ بە فانیلە عەلاگەکەو پاتۆڵی تراکسوتەکەیەوە، بەڕاکردن خۆی دەگەێنێتە چێشتخانەکە، بەگەیشتنی بەوێ ، دزەکەی بەردەم چێشتخانەکە دەکوتێ ، هاواری لێهەڵدەسێنێ ،بە بۆرییەکە سەروقاچی دەشکێنێ ، خۆی کردبوو بە ژوورا، یەکێ لەدزەکانی تری ناوچێشتخانەکەی گرتبوو بە بۆرییەکە بیرازی دەکا، ئەویشی شەل و گێڕ کردبوو،دوانەکەی تر بەپەلە خۆیان کردبوو بەناو تەوالێتەکەیاو لەودیوەوە دەرگاکەیان لەسەر خۆیان داخستبوو ، لەناو تەوالێتەکەوە تێلێفۆنیان بۆ پۆلیسکردبوو ،تا فرایایان کەون و لەلێدان و بیراز کردن ڕزگاریان کەن ، پۆلیسیش لەم تێلێفونەو لەم مشتومڕە نەگەیشتبوو، نەیزانی بوو کێ دزەو کێ تێلێفونیان بۆ دەکاو کێ لێێدەدرێ، هەم شتێک چووبوو بەیەکا، لەم کەین و بەینە حاڵی نەبوون هیچ تێنەگەیشتبوون، بەڵام بەپەلە خۆیان گەیاندبووە شوێنی شەڕەکەو دزەکانیان لە چنگ وەستای پیتزاکە ڕزگار کردبوو.
مەحکەمەو مەحکەمەکاری دەستی پێکرد ،هێنابوویانە گیرو گاز، بۆ لەو دزانەی داوەو دوانیانی شەل و گێڕ کردووەو دوانەکەی تریشی تۆقاندووە، لەسەر ئەو پەلامارو لێدانانە، ماوەیەک گیراو لێکۆڵینەوەیان لەگەڵدا کرد، پاشان کێسەکە داخراو ئەم لەدەستی پۆلیس و مەحکەمە ڕزگاری بوو.
بەختیار موستەفا
ستۆکهۆڵم
به‌روار: 25/11/2025
66 جار خوێندراوه‌ته‌وه
|