|
ئەو ڕۆژەی بۆ " مام عەبدولموتەلیب" گریام
ساڵی " 1977- 1978"
ماڵمان بەرامبەر مزگەووتی سەیوانی دووەم بوو لە برایم پاشا و مێرمناڵێکی نوێژکەری مزگەوتەکە بووم و زۆربەی نوێژکەرەکانی گەڕەک دەیان ناسیم ، چونکە خزمەتی مزگەوتەکەم دەکرد ، لە بەردەستی پیاوە گەورەکان.
ڕۆژێک پیاوێکی پیری گۆچان بەدەستی چاویلکە چاو لای ماڵی خۆمانەوە ، ووتی:
کوڕەکەم دەمبەیت بۆ مزگەوتی سەیوان، و لەگەڵیدا چووم ، ئەو دەیویست " شەهید مەلا عیسام" ی ئیمام ببینێت، بەڵام مامۆستا نەهاتبوو، مەلا کەریمی مجەور لەوێ بوو.
لە حەوشەی مزگەوت بە سێ قۆڵی دانیشتن، و قسەی بۆ مەلا کەریم کردو ووتی:
من عەبدولموتەلیبی عەرەبانچیم و کەوتە گێڕانەوەی ئێش و ئازارەکانی بەدەست مناڵ و بووکەکانی .
باسی زۆر شێوازی ئازاردان و بێزارکردن و دەرکردنی کرد لە ماڵە کوڕدا و ووتی:
زۆر جار ئاو دەکەنە ژێر دۆشەکەکەم ، بەڵام هیچ شوێنێک نیە بۆی بڕۆم.
من بەدیاریەوە دەستم کرد بە گریان.
لەو کاتەدا پیاوێک هاتە مزگەوت و سەیرێکی منی کرد و لە مەلا کەریمی پرسی:
ئەو مناڵە بۆ دەگری؟
مەلا کەریم ووتی: بۆ ئەو پیاوە پیرە دەیانەوێت دەری بکەن لە ماڵی کوڕەکانی.
ئیمشەو لە ناخی خۆمدا گەڕامەوە بۆ ئەو چیرۆکە و ئێستا کە دەیگێڕمەوە دەگریم و خوا شاهیدە فرمێسک بە چاومە دێتە خوارەوە.
کەم شت هەیە وەکو گریان ئاسوودەم بکات، بۆ هەموو شتێک دەگریم و بە تایبەت گریانی شەو.
زۆر جار دەڵێم گەر نوکتە نەبوایە کە لە دڵەوە دەمانخاتە پێکەنین ، ڕەنگە خەفەت و گریان نەشیکوشتینایە شێتی تەواو شێتی دەکردین.
مەرگ و مردن زۆر دەمگرینێت بەڵام بۆ دیمەنی هەژاری مرۆڤ لە هەموو کارەساتێ زیاتر دەگریم.
لە نێتا زۆر گەڕام بە شوێن وێنەیەکی مەلا کەریمی مجەوەر نەمدۆزیەوە.
شێرزاد عەزیز
مالمۆ
به‌روار: 31/08/2025
92 جار خوێندراوه‌ته‌وه
|