|
بەشار بو شەرع نەڕوخاوە
ئەوە پۆتین بوو لە شەو و ڕۆژێکا " بەشار ئەسەد" ی لە قوڕگی تورکیا و میرەکانی دوورگەی عەرەب دەرهێنا و لە ڕووخانی ڕزگار کرد، گەرچی ئێرانیش ڕۆڵی گەورەی هەبوو ، بەڵام بێ مۆسکۆ هیچی بۆ نەدەکرا.
ئەگەرچی شەڕی ئۆکرانیا ڕووسیای ماندوو کردبوو، بەڵام تا ئێستاش تەواو روون نیە " پۆتین بەشار ئەسەد" بەچی گۆڕیوەتەوە.
ڕژێمی عەلەوی بەشار بوە قوربانی " ئێران و حەماس" و ئەوە نەتانیاهۆ بوو ئەمریکا و ئەردۆغانی هێنایە ناو پرۆسەی ڕووخانی دیمەشقەوە.
لەسەرەتاوە " ئەردۆغان و قەتەر و سعودیە" شاگەشگە بوون بە ڕووخانی " دەوڵەتێکی عەلەوی " دۆستی گەورەی تاران و هاتنی " شەرعی هەم سونی و هەم ئیخوانی" ئەوەندەی تر غروری کردن.
بەگەرچی سیاسەت دایک و باوکی نیە و سەد جۆر بە قەبارەی بەرژەوەندی دەگۆڕێت، بەڵام لە گۆڕانی سوریادا ئیسرائیل سەنتەرە و وەکو چۆن خۆی فاکتەری یەکەم و گەورەی کۆتایی بەشار بوو، ئاواهاش ئەوە چاوەڕوانکراو بوو کە نایەڵێ کلیلی دیمەشق لە گیرفانی ئەردۆغان و هاکان فیدان بێت.
وەکو چۆن ڕووخانی سەدام ، دوژمنێکی گەورەی ئیسرائیلی پێ ئیفلیج کرا، سوریاش هەر بۆ ئەوە ڕووخێنراوە.
ئیسرائیل لەسەرەتاوە سەدان ئاماژەی نارد بۆ کورد و دروز و تەنانەت عەلەویەکانیش ، کە ئەو ناهێڵێ حوکمەتێکی کۆنە داعش دراوسێی بێ و لە زمانی وەزیری دەرەوەی بانگەوازی کرد کە " مانەوەی جولەکە و کەمە نەتەوەییەکانی ڕۆژهەڵاتی ناوەڕاست" و پاراستنیان لە عەرەب و ئیسلامی سیاسی" سونە بێ یان شیعە" بە دۆستایەتی و هاوکاری یەکتر دەبێت.
تەنها گرەنتیەک بۆ ئاسایش و پاراستنی سنووری باکووری ئیسرائیل ، سوریایەکی بێ هێز و ئیفلیج دەبێت ، ئەمەش تەنیا بە هەرێمکردنی یان بەش بەشکردنی دێتە دی.
بۆ ئیسرائیل ئیسلامی سیاسی " سونی بێت یان عەلەوی" هەر دوژمنە و بەهیچ نرخ و گرەنتیەک سازشی لەسەر ناکات
شێرزاد عەزیز
مالمۆ
به‌روار: 29/08/2025
49 جار خوێندراوه‌ته‌وه
|