|
حیکمەتی نەوشیروان مستەفا
کە سکرتێری یەکێتی بیری کردەوە له ئەگەری مەرگی خۆیدا چۆن یەکێک لە کوڕەکانی بکاتە جێگرەوەی، بۆ تێپەڕینی ئەم پلانە ڤیزەی " نەوشیروان مستەفا" ی دەویست، کە بە دڵنیاییەوە دەیانزانی ڕەتی دەکاتەوە.
کە کاک نەوشیروانیان دەرپەڕاند و یەکێتی بەجێهێشت و بزوتنەوەی گۆڕانی دروستکرد، دوای ئەوەی لە هەڵبژاردن دووەم هێزی هەرێم بوو پاش پارتی، کاتێکیش هەم کاک نەوشیروان و هەم گۆڕان و ئۆپۆزیسیۆن و کۆمەڵانی خەڵکیش گەیشتنە ئەو بڕوایەی " خەباتی پەرلەمانی و دیموکراتی" هیچ ناگۆڕێت ، و ئەو کاتە و لە سەرەتاشەوە ، دەیانجار پێشنیاری هێزی چەکداریان کرد بۆ گۆڕان، سەدان فەرماندەی پێشمەرگەی دێرین و نوێ ئامادە بوون بچنە ژێر چەتری کاک نەوشیروان بەڵام ، ئەو هەموو ئەو داوایانەی ڕەتکردەوە.
گەرچی گۆڕان کەوتە ژێر فشاری زۆر و سوکایەتی و پەلاماردانیش.
دواجار " یەکێتی و پارتی" دەیان پلانیان دادەنا گۆڕان کەتنێکی سەربازی بکات تا بە شەڕ زەبری لێبدەن و کۆتایی پێبهێنن.
بەڵام حیکمەتی " نەوشیروان مستەفا" لە ئەزموونی تاڵی شەڕی براکوژیەوە ، قوربانی گەورەی بەخۆی و بزوتنەوەکەش دا تا نەبێتە هۆکاری شەڕێکی وەکو لالەزار.
شەڕی لالەزار شەڕێکی ئەوپەڕی دزێوانە بوو ، کە دیمەنی پێشمەرگە قوربانیەکانی هەردوولا تابلۆیەکی ڕەشی دەسەڵاتی کوردە لە سلێمانی.
بەڵام ئەو تاوان و ڕەشە کوژییه ، بە پلەی یەک دەکەوێتە سەر شانی هێزێک کە سەرۆکەکەی لە حیزب غەدری لێدەکرێت ،کەچی هێزێکی چەکداری نایاسایی دروست دەکات و لە شەوی پێش تەقینەوەکە بانگەوازی هەموو لایەک دەکات ، کە پەلاماری هێزەکەی دەباشان بدرێت لە هەر شوێنێک کە دەتوانن.
هیچ هێز و دەسەڵاتێکی ڕۆژهەڵاتی ناوەڕاست بەو دەسەڵاتە ناشرین و گەندەڵ و مافیایەی باشووری کوردستانیشەوە ، بوار بە هێزێکی تری سەربازی نادات.
چەکدار و هێزی چەکدار کارەساتی لالەزار دروست دەکات، بەڵام سەرۆکی نەوەی نوێ چونکە چەکی نیە، ئەو هێزەی دەستگیری کردووە ناتوانێ ماڵەکەی بداتە بەر ئاربیجی و بە تانک تۆپبارانی بکات.
دەڤەری سەوز و بە تایبەت خەڵکی سلێمانی موستەهەقی ئەو هەموو دڵەڕاوکێ و سوکایەتیە نین.
خۆزگە لالەزار دەبوو بە وانەیەک بۆ ئەو حیزبانەی کە چەکداریان هەیە لە هەرێمی کوردستان ، بە ئاشتی و لە هەڵوێستی کوردانە و جوامێریەوە وازیان لە چەکداری حیزبی بهێنایە ،بە تایبەت حیزبی سۆسیال دیموکرات.
ئەوانەی دەڵێن بە چەک نەبێ گۆڕانکاری ناکرێت ، بەڵام ئەو چەکە ئەم چەکە نیە کە لە لەلازار یان گوڵەخانە یان هەر شوێنێکی تر هەڵگیراوە.
کورد هێندە ڕقمان لە یەکە کە شەڕ دەکەین دوژمنەکانمان نابینین " تورکیا و ئێران " و ئێراقیش بە ئاشکرا و نهێنی پشتیوانی فرە لەشکری دەکەن تا خۆمان بە خۆمان بخۆن.
شێرزاد عەزیز
مالمۆ
به‌روار: 27/08/2025
109 جار خوێندراوه‌ته‌وه
|