|
چالاکوانی خۆبەخش کێیە؟
ئێمە کە ئەزموونی 25 ساڵ چالاکیمان هەیە لە وڵاتی سوید ، دەتوانین بڵێین:
گەر لە هەر بوارێک کار بکەیت کە پەیوەندی بە ڕەوەندی کوردیەوە هەبێت ، بەرامبەر کار و ماندووبونت حەقەکەیت وەرگرتبێت ، مافی خۆتە و گەر بە پاکی کارت کردبێ و زۆرت لە خەڵک وەرنەگرتبێت " کارێکی پیاوانە" ت کردووە، بەڵام ئەوە کارە ، و هەموو کارێکیش لە ئەوروپا بە پارەیە.
بەڵام ناتوانیت بڵێیت چالاکوانی خۆبەخش.
بۆ نموونە تۆ لە کۆمەڵەیەکی کوردی دامەزراویت بە مووچە و دڵسۆزانە هەڵسوڕاویت ، ماندوو نەبیت ، بەڵام ئەوە کارە و خۆبەخشانە نیە.
وەکو خۆم ساڵی 2001 لە ڕادیۆ کوردی مالمۆوە دەستم پێکردووە.
ڕاگەیاندنی کۆمەڵەی کوردی مالمۆ
ڕاگەیاندنی کۆمیتەی ڕیفراندۆمی باشووری سوید
ڕاگەیاندنی کۆمەڵەی سکۆنەکورد
ڕاگەیاندنی کۆمیتەی هاوکاری کوردستانیانی مالمۆ
ڕاگەیاندنی کۆمەڵەی مالمۆکورد
ڕاگەیاندنی گرووپی چالاکڤانی کوردی مالمۆ
لە ساڵی 2011 ەوە سایتی مالمۆکوردم هەیە بە هاوکاری هاوکاران و ئەدمینەکان
دەتوانم کڤیتۆی " 500" هەزار کرۆن پیشان بدەم کە لە گیرفانی خۆم خەرجم کردووە.
دەمتوانی لە کۆمەڵەی کوردی مالمۆ یان کۆمەڵەی مالمۆکورد بە موچەیەکی باش خۆم دابمەزرێنم و نەمکردووە.
برادەر هەیە بە یەک تەلەفۆنی من ئێستا لە بواری کۆمەڵە کاردەکا مووچەکەی 37.000 کرۆنە و ژنەکەشی دامەزراندووە بە مووچەیەکی باش.
من کە کرێکاری دەکەم و تەوالێت پاک دەکەمەوە ، مووچەکەم 25.000 کرۆنە.
چالاکوانی خۆبەخش ئەو کەسەیه " کە هەر هەموو چالاکیەکانی بێبەرامبەرە و یەک قروشی ناوێت".
چەند بەختەوەرم بە بەرچاو ڕونیەوە دەستم پێکرد و ، دەیان جار بە هاوڕێکانم ووتووە:
نەک هەر چاوەڕێی سوپاسێک نیم ، بەڵکو خۆم حازر کردووە ، خەڵکانێک پەلامارم بدەن و لە حەسوودی خۆیان کە شوێن پارە و ژیان کەوتون، ، ئێمە و مانان دەبینن ڕەنگە لە داخا گڕ بگرن.
دەڵێن مرۆڤ حەز لە چی بکات ئەوە کۆدەکاتەوە، شۆڕشگێڕم ناسیوە گاڵتەی بە مەرگ هاتووە ،بەڵام داوای بتڵێک خوێنت لێبکردایە دەیدا، نەک بڵێیت 100 کرۆن بۆ کۆمەڵەی کوردی.
ڕۆژانە لە فەیس بووکەوە دەبینم بە ناوی چالاکوانی سەربەخۆوە چۆن پارە لە کۆچبەر و پەنابەری کورد دەماشنەوە.
چیرۆکی زۆر و هەمەجۆرم لایە و بە جار و دە جار ناگێڕێتەوە.
دەزانم زۆر تەنیام لێرەدا ، بەڵام دڵنیای دڵنیام پاش مردنم شانازی گەورەم بۆ خێزان و مناڵەکانم بە جێ هێشتووە، بەوەی بەرامبەر سەدان چالاکی قەرزاری یەک کرۆنی هیج حیزب و لایەنێک نیم.
گەر کەسێکتان ناسی لە نیوملیۆن کرۆنی گیرفانی خۆی خەرج کرد بوو ، سوپاس ناو و ژمارە تەلەفۆنەکەیمان بۆ بنێرن
لەگەڵ خەیامی مەزنا دەیڵێمەوە:
ئەوەی لە دونیا لەتێ نانی بوو
کەلاوەکۆنێ ئاشیانی بوو
پیاوی کەس نەبێ، کەس پیاوی نەبێ
هەر ئەو ژیاوە، ئەو ژیانی بوو
شێرزاد عەزیز
مالمۆ
به‌روار: 07/08/2025
122 جار خوێندراوه‌ته‌وه
|