|
ژنەکەی قوسەی و قاتەکەی سەدام
ساڵی 1990 پاش داگیرکردنی کوەیت، عودەی کوڕە گەورەی سەدامی دیکتاتۆر لە سەر ووتاری ڕۆژنامەی قادسیە وتارێکی نووسی کە دەڵێ:
باوکم تەنها یەک قات جلی سەربازی هەیە ، کە پیس دەبێت ، چاوەڕێ دەکات بۆی دەشۆن و ئینجا لە بەری دەکاتەوە.
له بڕگەیەکی تردا دەڵێ:
قوسەی برام کە ژنی هێنا " خەرجی ئاهەنگەکەمان" نەبوو، باوکم ڕانە مەڕێکی باپیرەمی بۆ مابوەوە لە" گوندی عۆجە" ئەوی فرۆشت بۆ هاوسەرگیریەکە.
کە ڕژێمی بەعس لە نیسانی 2003 ڕووخا ، تەوالێتە ئاڵتونیەکانی سەدام و دەیان ئوتومبێیلی دەگمەن و گرانبەهای عودەی کەوتنە دەست خەڵک.
لە ئێستادا کە " بێ مووچەیی" بڕستی لە گوزەرانی مووچە خۆران بڕیووە و ، بازاڕی کاسبکارانیش کز بووە، کەچی سەرانی حکومەت و حیزبەکانی دەسەڵات کە " ملیارەها دۆلاری" قووتی خەڵکیان بۆ خۆیان و سەد نەوەی دوای نەوەیان تاڵانکردووە، ئەوەندە ناجوامێر و سپڵەن بەخەڵک ، هەر نەیانکرد لەو هەموو سامان و موڵکەی کە مفت کەڵەکیان کردووە ، هەر نەبوایه مووچەی " جەژنی قوربان" یان پێ بدایە ، کە بۆ ئەوان هەر هیچ نەدەبوو.
خەڵک ئێستا باش لە کوردایەتی ئەم دەسەڵاتە نا نەپرسیارە تێگەیشتووە، کە پارە و نەوت و دۆلار بەهی خۆیان دەزانن و شۆڕشیان بۆ خەڵک نەکردووە.
هەر ئەوەی ماوە وەکو عودەی بێن و بڵێن " ئێمەش وەکو ئێوە " مووچەمان نیە" و حاڵمان شڕە.
ڕۆژێک دێت خوای خەڵک وەکو سەدام و نەوەکانی دەتانکات بە پەندی زەمانە.
قانیعی نەمر جوانی فەرمووە:
من و تۆ هەردوو زادەى یەک خاکین
بۆ تۆ حاکم و من ئاشەوان بم؟
ئەگەر لاى دوژمن هەردوو مەکروهین
چۆن تۆ وەزیر و من پاسەوان بم؟
شێرزاد عەزیز
مالمۆ
به‌روار: 02/07/2025
170 جار خوێندراوه‌ته‌وه
|