|
قاپە عەرەقەکانی شۆڕش
دەگێڕنەوە" کاک حەمەی بەکر" مەقام بێژ و دەنگخۆش و قسەخۆشی شاری سلێمانی، ساڵی 1958 لایەنگری حیزبی شیوعی عێراق دەبێت و ڕۆژێک خەریکی یارمەتی و پیتاک کۆکردنەوە دەبێت بۆ حیزب و شۆڕش، دەچێت بۆلای " کاک ئەحمەد میرزا " بۆ هەمان مەبەست.
دوای ئەوەی قەیرێک دائەنیشێت، کارتێک دەخاتە سەر مێزەکەی کە وێنەی " فەهد و باسم و حازم" ی لەسەرە و، کاک ئەحمەدیش ئەڵێ: "حەمە، ئەمە چیە و بۆ چی هاتوویت ڕاست و ڕەوان بیڵێ"
کاکە حەمەش ئەڵێ: "دەست بکە بە گیرفانتا و سەری خۆت بقەبڵێنە و یارمەتی حیزب و شۆڕش بدە".
کاک ئەحمەدیش تۆزێک ڕادەمێنێت و پاش تۆزێک لە سەر پارچە کاغەزێک دەنووسێت:
زۆر موحتەرەم جەرجیس ئەفەندی...
پاش عەرزی ئیحترام
وا کاک حەمەی بەکر، ئەنێرم بۆ لاتان، ڕجائەن پێنج قاپ عارەقی مەستەکی بدەنێ و لە سەر حسابەکەی خۆم قەیدی بکە.
کاغەز دەداتە دەست کاکە حەمەی بەکر و ئەویش دوای ئەوەی دەیخوێنێتەوە تووڕە دەبێت و دەڵێ ئەمە چیە؟ بۆ ئێمە شۆڕش دەکەین، یان مەیخانە دەکەینەوە؟
کاک ئەحمەدیش دەڵێ: گوێ بگرە کاکە حەمە، تۆ دەتەوێت من خۆم تووش بکەم و سبەینێ وەزع بگۆڕێت و یەکێک ئیعترافم لەسەر بکات و بڵێن ڕاستەوخۆ پارەی داوە بە شیوعی و شۆڕش؟!
نا... من شتی وا ناکەم بڕۆ ئەو قاپە عارەقانە وەرگرە و خۆتان بیکەنەوە بە پارە بۆ شۆڕش
شۆڕشێک نەتوانێت پێنج قاپ عارەق بکاتەوە بە پارە چۆن شۆڕشێکە!!!
به‌روار: 28/08/2025
57 جار خوێندراوه‌ته‌وه
|