|
ئاربیجیەکەی کەمالی ئایشێ قەڵەو
بۆ گیانی حاجی عومەر قۆزەڕەقەیی
پێش ڕاپەڕین" حاجی عومەری ڕەحمەتی" سەردانی باوکمیان کرد لە ماڵەوە و منیش لەگەڵیان دانیشتبووم.
حاجی عومەر ووتی: حاجی عەزیز ڕاپەڕین دەبێت و ئەنفالەکە" بەختیاری" دەکەین بە تەویلە و کەری تیا دەبەستینەوە.
پێش ڕاپەڕین" شەهید کەمال" زۆر هەوڵی لەگەڵ مندا بچمە شانە چەکدارەکان و ئەو دەم تازە هاوسەرگیریم کرد بوو نەچووم.
جارێک ووتی: بەگۆڕی شەهیدان نامەی مولازم عومەرم پێیە کە دەڵێ ڕاپەڕین دەکەین.
بەڵام لەگەڵ براکانیشم قسەی کردبوو.
یەکەم ڕۆژی ڕاپەڕین لە دەرگای ماڵی ئێمەی دابوو، " دادە گەوهەر" ی ڕەحمەتیم دەرگای لێکردبوە و ووتبووی کەسیان لەماڵ نین.
گرتنی ئەنفالەکەی بەختیاری و لەگرتنی ئەمنە سوورەکەش " دۆشکەکەی شەهید کەمال" ڕۆڵی گەورەی بینی و لە بیرەوەری ئێمەدا ڕاپەڕین واتە " شەهید کەمال و وەستا جەبار و نەبەزی نوسرەت خان " و گەنجانی بەختیاری.
پاش ڕاپەڕین بۆی گێڕامەوە :
کە پێش ڕاپەڕین جارێک مەفرەزەیەک ئەمن بردوویانە بۆ لای" ڕائید خەڵەف" ی مدیری ئەمن و ، پێشمەرگەی دێرین " ح.گ" لای مدیری ئەمن دانیشتووە و ویستوویانە پێکەوە وەعد بدات هاوکاریان بکات.
جارێکیش پێی ووتم : حەزت لە" دەمانچە یان کڵاشینکۆفە" بۆت بتهێم؟
داوای ئاربیجیەکم لێکرد بۆ " مامە تۆفیق" ی ئامۆزامان کە پێشمەرگەی دێرین بوو ، بنکەیەکی کردبوەوە لە قوتابخانەی ڕۆژهەڵات.
شەوێک لەگەڵ" حاجی مێووژ" ی ڕەحمەتی هاتن بۆ ماڵەوەمان و ئاربی جیەکی لۆکی بۆ هێنام کە لولەیەکی مقەبا لە ناو لوولەکەیدا بوو.
ساڵی 1992 کە " شەهید کەمال" لەو پەڕی دەسەڵاتیدا بوو ،" حاجی عومەر" دەهاتە ئەسحابەسپی و بە دەنگی بەرز دەیووت:
کوڕانی حاجی عەزیز هیچ ئیشێکم پێتان نیە و بەڵام ئێوە برازامن دێم بەیانی تا ئێوارە لەم دوکانە بەردەستیتان دەکەم.
ئێمەش وەک مامی گەورە بینیوومانە و ڕێز و خۆشەویستی گەورەی لامان هەبووە.
ئەم ڕاپەڕینە بە دۆشکە و ئازایەتی و پاڵەوانی و بوێری شەهید کەمالی ئایشێ قەڵەو و هاوڕێکانی بەختیاریی و خوێنی هەزاران شەهیدی پێشمەرگە هاتە دی و ، ئێستا چەند دز و مافیایەکی سیاسی پێی بوونەتە ملیاردێر و ملیۆنێر و سامانی فیرعەونانەیان بۆ دە پشتیان پێ کۆکردۆتەوە.
شێرزاد عەزیز
مالمۆ
به‌روار: 25/02/2025
138 جار خوێندراوه‌ته‌وه
|