سەربازە عەرەبەکان بەدبەخترین دیلی ڕاپەڕین بوون.

ئاداری 1991


ساڵی 1983 لە کەرتی زیندانی  مەڵبەندی یەکی  حاجی مامەند ، کۆمەڵێک سەربازی شکست خواردووی بەرەکانی شەڕی ئێران هەبوون.
بۆ خۆم تا ئەوپەڕی توانین هاوکاریم کردن.


ڕۆژێکیان " کاک ئاراسی حەمەلاو" کە بەرپرسی زیندان بوو ، چوار سەربازی برینداری دایە دەستمان و بڕی 10 دیناریش تا سواری پیکابەکەی حاجی مامەندیان بکەم و بچنە ناڵپارێز بۆ لای حکومەت.


ئەوان سواربوون و بۆ عەسری داهاتوو چوومە مزگەوتی گوندەکە سەربازێکیان گەڕابوەوە و لەوێ دەگریا.
کورتەی چیرۆکەکە ئەمە بوو:
لەیەکەم سەیتەرەی حکومەت هەر چواریان دادەگرن و لە دادگایەکی خێرای سەربازییدا " بڕیاری گولە بارانکردیان" دەدرێت بۆ ڕۆژی دوایی.
ئەمان لە ژوورێکی جەمالۆن دادەنرێن و شەو تۆپێکی ئێران لە نزیکیان دەتەقێتەوە و هەموویان ڕادەکەن، لە دواوە گولە باران دەکرێن و ئەم بەتەنیا بەر ناکەوێت و بە هەزار ناری عەلی خۆی گەیاندەوە مەڵبەند ، کە دواتر ووتیان بووە بە پێشمەرگە.


لەسەرەتای ڕاپەڕین ژمارەیەک سەربازی دیلیان هێنایە " قوتابخانەی ڕزگاری" کە چوار مەتر بەرامبەر ماڵی ئێمە بوو لە گەڕەکی بەختیاری.
خەڵکو خوای گەڕەک خواردنیان بۆ بردن.
دواتر کۆمەڵێک گەنجی خوێن گەرم هاتن و کە لێمان پرسین .
ووتیان  : هاتووین بیانکوژین.


پیاوانی گەڕەک لە وانەی کە دڵنیام  " حاجی ئەحمەدی ڕەحمەتی دوکاندار و مامۆستا ئەنوەر بەکر عارفی ئینگلیزی و شێرزاد" نەمانهێشت قەرەی سەربازەکان بکەوون.


ڕۆژانی دواتری  ڕاپەڕین دەچووین بۆ ئەسحابەسپی کە دوکانمان لەوێ بوو.


سەربازه عەرەبەکان کە دیلی ئازاد بوون  لە شاری سلێمانی ، بێ دەرەتان و بێ حاڵ و برسی بوون و زۆریان لە گەڕانەوەش  بۆ لای حکومەت دەبێت ترسابێتن.


نیوەڕوان لەبەردەم " چێشتخانەی سلێمانی" کۆ دەبوونەوە  و بەخۆڕایی خواردنیان دەخوارد.
ئەو  هەڵوێستەی "  حاجی فەتاح و کاکە حەمەی کوڕی"  ئەوپەڕی جوامێری و مێرخاسی ئەو باوک و کوڕە مرۆڤپەرورەن ، کە لە لاپەڕە جوانەکانی مێژووی ڕاپەڕین و شاری سلێمانی ە کە هەقە لە بیر نەکرێن.


شێرزاد عەزیز
مالمۆ


تێبینی:
بۆ پاراستنی پەیجەکەمان لە ڕیپۆرت:
ناچارین کومێنتی نەشیاو بسڕینەوە یان بلۆک بکەین.
سوپاس و ڕێز بۆ ڕەچاوکردنی


https://www.malmokurd.com/agadary-37271-3
به‌روار:  06/03/2024
394   جار خوێندراوه‌ته‌وه
مافەکان پارێزراوە بۆ مالمۆکورد
میوانی سه‌رهێڵ:   601
کۆی سه‌ردان:   29240271