|
پرسەکانی مالمۆ🇸🇪
ڕۆژی 2006.11.15 " فەهمی خراجیانی" لە کۆمەڵەی کوردی مالمۆوە تەلەفۆنی بۆ کردم، لە ڕێگای لوند دەچووم بۆ کار و ووتی:
مامۆستا بەیانی تەرمی " بەهنامی برای کاک بەهرۆز" بەخاک دەسپێردرێت بەڵکو خەڵکی مالمۆ بە نامە ئاگادار بکەیتەوە.
ئەو کاتە " نۆکیایەکی 3310" م هەبوو، دەبوا نامەکە دانە دانە بنێریت و بۆ نزیکەی 100 کەسێکم نارد.
وتەیەکی جوان هەیە لە " داغستانی من" ی ڕەسوڵ حەمزەتۆڤ دا کە دەڵێ:
ئەو قسەیەی دەتوانی لە کۆتاییدا بیکەی لە سەرەتادا مەیدرکێنە.
بە پێچەوانەی ئەم ووتەیەوە لەسەرەتاوە دەڵێین:
مەبەست لە گێڕاندنەوەی ئەم بیرەوەریانە بۆ منەت کردن نیه بەڵکو بۆ دڵشکاندنە لە ماوەی ئەم 19 ساڵەدا ، لە کاتی پرسە ناردندا کە تەنیا دەکرێت هەندێکی بگێڕینەوە ، نەک هەمووی.
کە پرسەکانم بە نامە دەنارد، خەڵک هەبووە چووە بۆ پرسەکە و وتویەتی " ئەوە چیە خۆی لە پرسەکە نیە و بۆ ئێمەشی دەنێرێت.
خەڵک هەبووە تەلەفۆنی بۆ کردووم و وتویەتی:
ئەو پرسەیە پرسەی فڵانە ، من چۆن دەچم بۆ پرسەی ، ئەو بۆ پرسەی من نەهاتووە.
خەڵکانێک هەبوون کە نەدەچوون بۆ پرسەیەک و خاوەن پرسەکە کە گلەیی لێکزدوون، وتویەتی نامە بۆ من نەهاتوە" لە کاتێکا بۆشم ناردووە".
دواتر لەبەر خاتری پرسەکان و ئاگاداریەکان مۆبێلی" htc" م دەکڕی ، کە تەنیا مۆبێل بوو 150 نامەی بە یەکجار دەنارد .
جارێک مۆبێلەکەم کێشەی هەبوو " بۆیان چاک دەکردم" و مۆبێلێکی 3310 یان دابومێ بە قەرز.
جارێک لە کار بووم ، هاوڕێیەک تەلەفۆنی بۆ کردم و پرسەیەکی هەبوو ، ووتم کە گەڕامە ماڵەوە پرسەکان دەنێرم ، ووتی : نەوەڵا ئێستا بینێرە. بە پاسکیل چومەتە ماڵەوە 150 ژمارە زیاترم لەسەر کاغزێک نوسیبوەوە " مۆبێلەکەم لە چاکردن بوو" هێنام و گەڕامەوە بۆ ئیش.
نامەکان دەبوو دانە دانە بنێردرێن.
ناسیاو هەبووە زۆر لە خەڵک دابڕاوە و پرسەی هەبووە "لەگەڵ هەندێ هاوڕێدا" پرسەکەمان لەگەڵ گرتووە ، دوایی نەک هەر نەهاتۆتە پرسەی خۆمەوە، بەڵکو کە تەلەفۆنم بۆ کردووە بۆ سەرخۆشی پرسەیەکی تری وەڵامی نەداوینەتەوە.
کەس هەبوە پاش 10 ساڵ نامە ناردن، کە بۆ پرسیارێک تەلەفۆنم بۆ کردووە، وتویەتی تۆ کێیت؟
خەڵک هەبووە ژمارەکەی داوە بە عەرەبێک و پێی نەوتوم، جارێک تەلەفۆنی بۆ کردم وتی سکاڵات لێدەکەم لای پۆلیس بۆ نامە بۆ ژنەکەم دەنێریت.
جارێک گلەییم لە هاوڕێیەک کرد کە لە مەسەلەیەکدا ئاگاداری نەکردوم ، ووتم : من ئەم مانگە 7500 نامەم ناردوە کە " هەموو نامەکان بە پارە " بووە و ، لە هەموو شتێک ئاگادارتان دەکەم ، کەچی دەڵێ:
تۆ خۆت حەز لە نامە ناردن دەکەیت.
پرسە هەیه کە لە " کوردستان" بووم و بۆ مالمۆم ناردۆتەوە 1200 کرۆن لەسەرم کەوتووە.
جارێک لە ئیتاڵیا بووم و برادەرێک تەلەفۆنی بۆ کردم و پرسەی هەبوو، 700 کرۆنێک لەسەرم کەوت.
خەڵک هەبووە نەک نەهاتۆتە پرسەی دایکمەوە ، بەڵکو بە تەلەفۆن سەرخۆشی لێنەکردووم و کە دیومی سەرخۆشی لێکردوم .
خەڵک هەبووە پرسەمان هەبووە نەهاتوە و کە خۆی پرسەی هەبووە کات 6.00 بەیانی تەلەفۆنی بۆ کردم و ئاگاداری بنێرم.
پرسە هەبووە لە مالمۆ کە بڵاومان کردۆتەوە ، خاوەن پرسە تەلەفۆنی کردووە و وتویەتی زانیاری هەڵەت بڵاوکردۆتەوە، یان دەبێ ناوی ئەو کەسەم پێ بڵێیت کە پێی وتویت ، یان سکاڵات لای پۆلیس لێدەکەم ، زانیاریەکەمان لە هاوڕێیەکەوە وەرگرت بوو ، " هەڵبەت ئەمانەت دەپارزرێت" چەند خۆت زەرەمەندیش بیت.
خەڵک هەبووە پرسەی هەبوە " یان نوکەی کردوە ،یان بە ڤایبەری بەلاش" تەلەفۆنی بۆ کردوم کە پرسەکەی بە ئاگاداری بنێرین.
لە 2019 هەر پرسەیەکی مالمۆ هەبووبێت " 100" کرۆن سپۆنسەرمان کردووە لە گیرفانی خۆمان لە" پەیجی پرسەی هەندەران" .
خۆم دوو پرسەم هەبووە " پرسەی باوکم و دایکم" نە بە نامە بۆ کەسمان ناردووە نە لە "مالمۆکورد و پرسەی هەندەران" بڵاومان کردۆتەوە.
بۆ ئاگری نەورۆزی ئیمساڵ "320" نامەم نارد بۆ هاوکاری " 20.000" کرۆن ، کەچی دەیان خێزان بە خۆیان و هاوسەر و مناڵەوە دێن بە " بەلاش هەڵدەپەڕن" کەچی ئامادە نین هاوکاری " 100 کرۆن" بکەن.
ووتم " شێرزاد ئاسنی سارد دەکوتیت" هەم خۆت و هەم گرووپ چالاکڤانی مالمۆ لەگەڵ " حاجی ئەترووشی و مراد برادۆستی و کەریم بارزانی" .
بۆیه بە دڵنیاییەوە بڕیامدا کە جارێکی تر پرسە بە نامە نەنێرین " جگە لەوەی تەنیا لە فەیسبوک بڵاوی دەکەینەوە".
بڕیار بوو ڕۆژی " 2025.9.6" کۆڕێک بۆ ڕۆمانووس و ڕۆشنبیری ناوداری کورد " بەختیار عەلی" ساز بکەین ، درۆیەکی سپیمان کرد و کۆڕەکەمان هەڵوەشاندەوە.
ئاخر چۆن دەکرێت ئێمە چالاکی بکەین و ماندوو بین و دوایش جەنابتان بە پۆزێکەوە بێن و قاوەی بەلاش بخۆنەوە و بە منەتیشەوە بڵێن:
ئەم کۆڕ و چالاکیانە باوی نەماوە لەبەر خاتری ئێوە دێین.
من دڵنیام قەرەجە ڕۆمانیەکانی مالمۆ لە چالاکی کلتوری خۆیاندا لە کورد چالاکتر و گەرم و گوڕترن.
زۆر جاریش لەگەڵ هاوڕێکانی گرووپدا ووتومە:
کێ دەڵێ : هەڵەکە " ئێمە" نین و بەرۆکی خەڵک بەرنادەین ، دەنا خەڵک وازی لە هەموو شتێک هێناوە ، ئێمە وازیان لێناهێنین
شێرزاد عەزیز
مالمۆ
به‌روار: 21/06/2025
26 جار خوێندراوه‌ته‌وه
|