|
داستانی مامە یارە دژ بە تورکە مەغۆلەکان
ئەوا ئەمڕۆش
مامەیارە ئەسپسوارێکی زۆر قۆزە و
هاتۆتەوە
لەسەر لووتکەی پیرەمەگرون ڕاوەستاوە و
هاوار ئەکات
ئەم بێدەنگییە نەکوژن
ئەتانکوژێ
ئەو دەڵە دێوە سەر نەبڕن
سەرتان ئەبڕێ
ئا ئەم تەمە ڕانەماڵن
خواش ون ئەکەن
لق ئەبێ چاوی لە پەل و
پەلیش گەڵای خۆی ببینێ
مامەیارە ئەسپسوارێکی تووڕەیە و
هاتۆتەوە
بەرەو هەر مەڵبەندێ ئەچێ
خوێن جڵەوی لێ وەرئەگرێ
لەناو تەمدا
حیلەی ئەسپەشێ: هاوارە
مامەیارە فەقیانەی سوور
هەڵ ئەکات و
یەک دوو ئاوزەنگی لێ ئەدا و
وەکوو نەورۆز
هەڵ ئەگیرسێ و
ئەچریکێنێ:
کێ دڵدارە و
کێ دڵدارە؟!
شێرکۆ بێکەس
داستانی مامە یارە
به‌روار: 19/01/2025
54 جار خوێندراوه‌ته‌وه
|