وەک تارمایی هاتوومەوە ، 
ئەگەڕێم و ، کەس ناناسم و کەس نامناسێ ، 
شەو و ڕۆژم تێکەڵبوە و ، 
شپرزەم و ، هەر وەکو جاڵجاڵۆکەیەک 
لەداوەکەی خۆم وونبوم و 
نازانم چۆن ببم بەخۆم !!
لەشارێکی تەڵخبوی وا 
سڕتر بووم و 
لەنیگەرانی و ماتیا ، 
زۆرم نەماوە خۆم بخۆم !!

شەقامەکان وەک غەریبێ ڕام ئەکێشن
یادەوەریەکان لەڕۆحما ئەسوتێن و ، 
چنگێ خۆڵەمێشە بوونم ،
هەستێکی نەبڕاوەم لێرە و 
وەک گەردەلوولێکی شێواو
بەردەوام خەریکی هەڵچوونم ، 

پشیلەکان ئەترسن و نیگەرانن، 
وەکو بڵێ ی بمناسن و 
وەک غەریبێ ، 
زۆر لەدوورەوە هاتبێ 
لە ناو قوڵایی چاویانا بانگم بکەن ،
لەئاهێکی ئاسمانیا
وەکو بڵێ ی .. بیانەوێ لەم دۆزەخە و ، 
لەهەموو زەمین ڕابکەن ،

وەک فریشتە بێ خوداکان ، 
بێماڵن و 
ڕۆحم بریندارتر ئەکەن ، 
بارانی حەسرەت لەناخما ئەبارێنن و 
ژانەکانم وەک ئاسمان گەورەتر ئەکەن ، 

وەک مناڵێکی بەتەمەن ، 
لەناو ئەم حەشاماتە ، زۆر زۆر تەنیاو  ، وونبوەدا 
دێم و دەڕۆم ، 
وەکو سەراب ، لەدەریاوە هاتبێتم
کەنارم دابێت بەکۆڵماو 
وەک شەپۆلێک ، هاوارێکی تاساوبم و 
لەناو خۆما  خنکابێتم  

لەم شارەیا ، 
دوکەڵی مەرگ سنگی ژیانی گرتوە و 
خزەکانی وەک سەمفۆنیا هەرچی سەگی بریندارە 
هێناوێتی بۆسەر شانۆی ڕووتبونەوە ،
وەڕینێکی ئەبەدیە و ، مانای لەخواش سەندۆتەوە ،
هاوارێکە و 
شووشەی پەنجەرەی ویژدانی هەموومانی شکاندوە ، 
دەرگای لەسەر قیامەتی هەموومانی کردۆتەوە
هیچیش ناکەین !!!!

لەمشارە زۆر ڕزیوەیا ، 
هیچ هەیبەتێ بۆ ژیان و 
هیچ شانازیەک بۆ مانەوەی ، تیا نەماوە ،
خوکوشتنێکی جەماعی 
لەناو چاوی سەگەکانا ئەبینم و ، 
وەک زریانێ
لەگەڵ خۆیا زۆر دوور ئەمبات ، 
لەناو قەدەوە ئەمگرێ و ، 
وەک ڕزیوێ فڕێم ئەدات ، 

ئیزرائێل لەناومانایە و ، 
لەهەموو باخچە و سەرایەک پیاسە ئەکاو ، 
لەناو ماڵی هەر یەکێک لەئێمەدایە و 
ناشی بینین ، 
بەسرنجێکی خوێناوی کاتەکانمان هەڵئەمژێ و 
بەرە بەرە ووشکمان ئەکات …
لەگەڵ مناڵانا ئەنوێ و ، نان ئەخوات و ، 
یارییش ئەکاو ،
دەس لەسەری هەموان ئەدا و ، 
ناشی بینین ، 

ژانێکی قووڵ لە ڕوخساری سەگەکانا ئەبینم و ، 
وەکو خەمی لەدەستدانی خودایەتی لەناخمدا ئەمتاسێنێ ،
سەمفۆنیای مەرگ لەگەرویانا نووستوە و 
گریانێکی ئاگراوییش  وەکو سەگوەڕ 
هەموو شەوێ لەناخەوە ئەمسوتێنێ ، 

حەسرەتێکی قووڵ ئەمکوژێ و ، 
وەکو زەنگی خۆفڕێدانە خوارەوە 
لە دەرگای ئەم دڵەم ئەدات ، 
چەند ئەگەڕێم و ئەشبینم ، 
ئەم دۆزرخەی بەبێ بەهەشت لێرە هەیە
وەک عفریتێک لەناخەوە
تووڕەم ئەکات ، 

ئیتر نازانم چۆن چۆنی بڕۆمەوە
ئەو سەگە زۆرە بێماڵە و 
ئەو هەموو پشیلە دەربەدەر و وونبوانە 
چۆن لەبیر کەم !!
ئەو سیمایانە لەناخما وەک تارمایی 
هەموو تاریکی ناو کۆشکی 
ڕۆحی تەنیام داگیرئەکەن
وەک قەڵایەک لە لم بم و 
ئەم بیرەوەریانەی ناڕۆن 
بەپەلەپیتکەیەک ئەمخەن ،

مەجید عەزیز