بەکوردی پێی دەڵێم : تورک لە من بەرزتر نیە!!
«زەكی ڕەزا باكلان، چەند ساڵ لەمەوبەر لە زیندانی دیاربەكر ژنێكیان ھێنا توركیی باش دەزانی، توركیی لە من و ئەفسەرەكە و حاكمە سەربازییەكانیش باشتر دەزانی.
ھەموو جارێك چەندەھا سەعات ئەشكەنجەیان دەدا تا وای لێبكەن بە توركی وەڵامبداتەوە، ھەموو شتێكی خراپیان بەرامبەر دەكرد، لێیاندەدا، لاقەیاندەكرد، نینۆكیان دەردەھێنا... شت نەبوو بەرامبەری نەكەن، ھێندە جگەرەیان لەسەر مەمك و سمتی كوژاندبووەوە ناویان نابوو تەپڵەكی جگەرە. ھەموو جارێك كاتێك دەیانھێنایەوە بەردەمی دادگا و حاكم دەیپرسی «ھا تەپڵەكی جگەرە ئێستا دەڵێیت چی؟». كیژەكە دیسان ھەر بە كوردی وەڵامیدەدایەوە. ئەوسا دووبارە دەیانناردەوە بۆ ئەشكەنجە.
چەندەھا مانگ ئاوھابوو، حاكمەكان شێت بووبوون بەدەستییەوە و جەلادەكانیش ماندووبووبوون، ئەویش خۆی گەیشتبووە سەرەمەرگ. جارێك گووتم: بۆ وا دەكەیت، تۆ توركی دەزانیت، بۆ ئەم عەزابە بەسەر خۆتدا دەھێنیت، جارێك بە توركی وەڵامبدەرەوە و با ڕزگارت ببێت و بەس بێت.
گووتی: عەلی ئیحسان، حاكم لە تۆ باشتر دەزانێت من توركی دەزانم، ئەو شتێكی تری دەوێت. دەزانێت ئەگەر بە توركی وەڵامم دایەوە، دان بەوەدا دەنێم ئەو لە ڕەگەزێكی بەرزە و من سەر بە نەتەوەیەكی نزم. حاكمە توركەكان پەنجا ساڵە لێرە تەنیا بەدوای ئەوەوەن بیسەلمێنن ئەوان لە ڕەگەزێكی بەرزن و ئێمە لە ڕەگەزێكی نزم. كاتێك كوردی قسەدەكەم، دەمەوێت یەك ڕاستیی پێبڵێم، ئەویش ئەوەیە: ئەو لە من بەرزتر نییە».
عەلی ئیحسان ئاكانسو بۆ زەكی ڕەزا باكلان.
لە ڕۆمانی «داگیركردنی تاریكی».
"بەختیار عەلی"
بهروار: 17/07/2024
487 جار خوێندراوهتهوه
|