دەستپێشخەری دادپەروەری بۆ کوردان رۆژی ٣١ی کانونی دووەم کاتژمێر ١٣:٣٠ لە گۆڕەپانی شومان لە تەنیشت ئەنجومەنی یەکێتی ئەوروپا لە بروکسێل کۆنفرانسێکی رۆژنامەوانیان ساز کرد. لە کۆنفڕانسە رۆژنامەوانییەکەدا دەستپێشخەرییەکە بۆ ئەوەی پەکەکە لە لیستی رێکخراوە تیرۆریستییەکانی یەکێتی ئەوروپا دەربهێنرێت ملیۆنان واژۆیان رادەستی ئەنجومەنی یەکێتی ئەوروپا کرد.  دوای راگەیەندراوەکە کە بە ناونیشانی "لە سەر ناوی ئاشتی، دیموکراسی و مافەکانی مرۆڤ ئێمە داوا دەکەین ئەنجومەنی ئەوروپا پەکەکە لە لیستی رێکخراوە تیرۆریستییە قەدەغەکراوەکان دەربهێنێت" سازکرا، وتەبێژی رێکخراوی ئاشتی بەلجیکی ڤێرد لودۆ دی براباندێر، نوێنەری پرۆگرێسیڤ ئینترناشناڵ دانیەل کۆپ و سەرۆکی پارتی چەپی ئەوروپا-ئی ئێڵ واڵتەر بایەر قسەیان کرد و باسیان لەوەکرد کە دەبێت پەکەکە لە لیستەکە دەربهێنرێت.

براباندێر: ئەگەر ئاشتیتان دەوێت، پەکەکە لە لیستەکە دەربهێنن

وتەبێژی رێکخراوی ئاشتی بەلجیکی ڤێرد لودۆ دی براباندێر لە بارەی رادەستکردنی واژۆکان بە یەکێتی ئەوروپا وتی، "بۆ ئەوەی پەکەکە لە لیستی تیرۆر دەربهێندرێت ئێمە لێرەین. زۆر بڕیاری دادگاکان هەیە کە دەڵێن پەکەکە رێکخراوێکی تیرۆریستی نییە، رێکخراوێکە کە لایەنگری شەڕ نییە. هەوڵ دەدرێت تێکۆشانی مافخوازانەی کوردان پێچەوانە نیشان بدرێت. دەبێت کۆتایی بەوە بهێندرێت. ئەگەر ئێوە لە تورکیا ئاشتیتان دەوێت، لە رۆژهەڵاتی ناوەڕاست لەگەڵ کوردەکان ئاشتیتان دەوێت، دەبێت پەکەکە لە لیستی رێکخراوە تیرۆریستییەکان دەربهێنن".

کۆپ: پەکەکە گوزارشتە لە تێکۆشانی یەکسانی

ئەندامی سکرتاریەتی پرۆگرێسیڤ ئینترنەشناڵ دانیەل کۆپ وتی: "پرۆگرێسیڤ ئینترنەشناڵ رێکخراوێکی نێونەتەوەییە بۆ ئەوەی هێزە پێشکەوتنخوازەکان لەسەرتاسەری جیهان سەفەربەر بکات، بە رێکخستنیان بکات و یەکگرتوویان بکات، دامەزراوە. ئەمرۆ لەگەڵ دۆستانی کوردمان داوای دەرهێنانی ناوی پەکەکە لە لیستی ئەوروپا دەکەین. بۆ چەند ساڵ دەچێت پەکەکە لە سەر داوای دەوڵەتی تورک لەلایەن یەکێتی ئەوروپاوە وەک رێکخراوێکی تیرۆریستی ناسێندراوە. ئەوە راست نییە و هەڵەیە. پەکەکە رێکخراوێکی تیرۆریستی نییە. پەکەکە پارتێکی سیاسیە و گوزارشتە لە تێکۆشانی کوردان لە پێناو ئاشتی و یەکسانی لە تورکیا. لەبەر ئەوە ئەمرۆ لێرەین، لە چوار لای جیهانەوە ملیۆنان واژۆ رادەستی دامەزراوەکانی ئەوروپا دەکرێت. بۆ پێشکەوتنی ئارامی و ئاشتی لە رۆژهەڵاتی ناوەڕاست، دەبێت پەکەکە لە لیستی تیرۆر دەربهێندرێت".

بایەر: پەکەکە نوێنەری گەلی کوردە

سەرۆکی پارتی چەپی ئەوروپا-ئی ئێڵ واڵتەر بایەر بەم جۆرە قسەی کرد: "من بە نوێنەرایەتی پارتی چەپی ئەوروپا بەشداری خۆپیشاندان و کۆنفڕانسی رۆژنامەوانی بووم. لەبەر ئەوەی پشتیوانی لە تێکۆشانی گەلی کورد بۆ یەکسانی، دیموکراسی و مافی چارەی خۆنوسین دەکەین. بۆ چارەسەرکردنی شەڕ لە نێووان کورد – تورک، دەرهێنانی پەکەکە لە لیستەکە بۆ ئاشتی پێویستە. لەبەر ئەوەی پەکەکە بەشێکە لە چارەسەری. پەکەکە نوێنەری گەلی کوردە و بۆ ئاشتی خاوەنی پێگەیەکی گرنگە. لەبەر ئەوە پارتی چەپی ئەوروپا بۆ ئەوەی رێگری لە دۆخ و لایەنەکانی شەڕ بکات و چارەسەرێکی ئاشتیانە بێتە ئاراوە، یەکگرتنی گەلانی بە بنەما گرتووە".
فورات نیوز