مامۆستا زاراوە بۆ ژینای جونەمەرگ - گەڕانەوە بۆ خەباتی مەدەنی
مامۆستا زارا و ژینای جونەمەرگ خەباتی مەدەنیان خستەوە سەر لوتکەی ڕۆژەڤی خەبات لە ڕۆژهەڵات و ئێراندا. دڵشاد و شانازم دوو خانم بوون بەسەرمەشقمان و ئەقڵی ئێمەی پیاویان گۆڕی. بە داخەوەم یەکیەکیان لە زیندانە و ئەوی دیکەیان، ژێر گڵ.

بە پێویستم زانی هەندێك سەرنجی سەرپێیم بۆ داڕشتنی نەخشەڕێی گۆڕانکاری لە ڕۆژهەڵاتی کوردستان و ئێراندا بنووسم، گەر کامڵیش نەبن.

- تێکەڵکردنی چەکدار بە خەباتی مەدەنی خەڵکی کوردستان، لەم قۆناغەدا، پرسی کورد دەشێوێنێ. گەر حزبی ڕۆژهەڵات دەیانەوێ بەشداری ڕاپەڕێنی خەڵك بکەن دەتوانن لەم پرسانەدا هاوکار بن کە لێرەدا دامڕشتوون.

- چەك تێکەڵی ڕاپەڕینی خەڵك نەکەن. ئەمە ڕاپەڕینی خەڵکی مەدەنی دەبەستێتەوە بە توندوتیژیەوە، کە دوور نیە پشتگیری خەڵکی ئێران و کۆمەڵگەی نێودەوڵەتی لە دەست بدات.

- خەڵکی ڕاپەڕیو خۆی نەکات بە قوربانی، پێویستمان بە ژیانە نەك مەرگ.

- ڕاپەڕین تا دەکرێ سەر و ماڵی خەڵك بپارێزێ. تەنانەت گەر هەموو کوردستانیش ئازاد کرا و هەموو دەسەڵاتداران کەوتنە دەست خەڵك، پێویستە ڕێی قانونی بگیرێ بۆ سزای هەموو تۆمەتبارێك، نەك وەك ئەوەی لە ڕاپەڕینی ١٩٩١دا باشوردا ڕووی دا. دەبێ ئێمە وەك ئەوان نەکەین و ڕێی مەدەنی بگرینە بەر.

- حزبی خۆرهەڵات، بە هۆی پەیوەندیان، دەتوانن بەردەوام زانیاری ورد دەربارەی پێشێلکاری دەسەڵات بدەن بە کۆمەڵگەی نێودەوڵەتی، وەك میدیا، پەرلەمان، حکومەت، ڕێکخراوی مرۆڤپەروەر، تد. ڕاپۆرت پێویستە زۆرتر بە زمانی ئەوروپی بێ، وەك ئینگلیزی، فەڕەنسی و ئەڵمانی.

- هاوکاری ڕێکخستنی ڕاپەڕین و گواستنەوەی بکرێ بۆ سەرتاسەری ئێران. حزبی خۆرهەڵات دەتوانن کەڵك لە پەیوەندیان لەگەڵ هێزی نەتەوەکانی دیکە وەربگرن.

- نوێنەری خەڵكی ڕاپەڕیو لە دەرەوەی ئێران ڕێکبخرێ و لەگەڵ پەڕلەمان و حکومەتی وڵاتانی ئەوروپیدا کۆببنەوە تا ئامانجی ڕاپەڕین تاوتوی بکەن و فشار بخەنە سەر ئێران.

- ئامانجی ڕاپەڕین دیاری بکرێ؛ لەم قۆناغەدا دەبێ ئامانجی واقعی بێ، بۆ نمونە: چەسپاندنی مافی خەڵکی کوردستان و نەتەوەی دیکە لە دەستور و قانونی ئێراندا. هەندێك لەو مافانە، دەکرێ مافی مەدەنی بن، وەك ئازادی خود، کۆمەڵگە و نەتەوە لە ئێراندا: خوێندن بە زمانی زگماك و دەستنیشان کردنی نەتەوەکانی ئێران لە دەستوردا؛ گۆڕینی زمانی فەرمی ئێران لە دەستوردا بەوانی هەموو نەتەوەیەك، نەك تەنیا فارس؛ گۆڕینی زمانی فەرمی لە نێوچەی کوردنیشندا بە زمانی کوردی و زمانی فارسی.
د. ڕێبوار فەتاح
لەندەن
به‌روار:  20/09/2022
141   جار خوێندراوه‌ته‌وه
مافەکان پارێزراوە بۆ مالمۆکورد
میوانی سه‌رهێڵ:   887
کۆی سه‌ردان:   27894954