|
ئەردەن دزێکی گەورە ڕادەستی عیراق دەکاتەوە
خەڵک-
وڵاتی ئەردەن ئامادەکاری پێویستی کردووە تاوەکو زیاد قەتتان سکرتێری پێشووتری وەزارەتی بەرگریی عیراق ڕادەستی عیراق بکاتەوە کە سزای لەسێدارەدانی بۆ دەرکراوە.
زیاد قەتتان لە ساڵانی 2004 و 2005 ئه‌مینداری گشتیی وه‌زاره‌تی به‌رگریی عیراق بووە، لە لایەن دادگای تاوانەکانی بەغداوە بە تۆمەتی گەندەڵی و بەھەدرەدانی پارەی دەوڵەت و ساختەکردنی چەند گرێبەستێکی گەورەی کڕینی چەک و کەرەستەی سەربازیی لە وڵاتانی جیاواز سزای لەسێدارەدانی بۆ دەرکراوە، لەو گرێبەستانەی قەتتان واژۆی کردوون، نزیکی ملیارێک دۆلار بێسەروشوێن بوون.
زیاد قەتتان لە مانگی شوباتی 2017 لە فرۆکەخانەی شاژنە عەلیا لە عەممانی پایتەختی ئەردەن لە کاتی گەڕانەوەی لە پۆڵەندا، لە لایەن ئینتەرپۆڵ و بە ھاوکاریی دەزگائەمنییەکانی ئەردەن دەستگیر کرا.
دواتر لە دادگای ئەردەن داوای تۆمار کرد تا ڕادەستی عیراقی نەکەنەوە چونکە سزای لەسێدارە دانی ھەیە، بەڵام دادگای داواکەی ڕەتکردەوە، دواتر دادگای تێھەڵچوونەوەش لە تەمموزی 2017 ھەمان بڕیاری دادگای عەممانی پەسەند کرد بە ڕادەستکردنەوەی زیاد قەتتان بە عیراق.
به‌روار: 16/04/2018
817 جار خوێندراوه‌ته‌وه
|