|
كۆرپەیەكی فڕێدراو لە كەركووك دۆزرایەوە
رووداو- هەولێر
سەرۆكی لیژنەی ژنان و منداڵ و مافی مرۆڤ لە ئەنجوومەنی پارێزگای كەركووك، رایگەیاند: "فڕێدانی كۆرپە لە شاری كەركووك خەریكە دەبێتە دیاریدە."
جوان حەسەن، سەرۆكی لیژنەی ژنان و منداڵ و مافی مرۆڤ لە ئەنجوومەنی پارێزگای كەركووك بە تۆڕی میدیایی رووداو ی راگەیاند"ئێوارەی چوارشەممە 19-4-2017 لە شەقامی پزیشكانی پارێزگای كەركووك كە یەكێك لە شەقامە جەنجاڵەكانی شاری كەركووكە كۆرپەیەك دۆزرایەوە. بەداخەوە فرێدانی كۆرپە و منداڵ لە شاری كەركووك خەریكە لە حاڵەتەوە دەبێتە دیاریدە. لەماوەی رابردوودا ئەمە شەش حاڵەتی فڕێدانی منداڵە هەبوون."
سەبارەت بە چارەنووسی منداڵە دۆزراوەكە، جوان حەسەن، گوتی"كۆرپەكە دوای دۆزینەوەی لەلایەن خەڵكییەوە رادەستی بنكەی پۆلیسی رەحیماوە كراوە، پەڕاوی لێكۆڵینەوە بۆ رووداوەكە كراوەتەوە تاوەكو ببردرێتە لای دادوەر بۆ ئەوەی بڕیار لەبارەی چارەنووسی ئەو كۆرپەیەوە بدات، ئەگەر كەسوكاری بوو باشە، ئەگینا دادوەر دەیدات بە یەكێك لەوخانەوادانەی ئامادەن منداڵەكە لەخۆ بگرن."
سەرۆكی لیژنەی ژنان و منداڵ و مافی مرۆڤ لە ئەنجوومەنی پارێزگای كەركوك، گوتیشی: "بەهۆی ئەوەی لە شاری كەركووك خانەی منداڵانی بێسەرپەرشتمان نییە، بۆیە شەو منداڵەكە دەبردرێتە نەخۆشخانە تاوەكو دادوەر بڕیاری كۆتایی لەبارەی كەیسەكەوە دەدات."
هیوا حوسامەدین، پەیامنێری رووداو، رایگەیاند: "كاژێر 3ی ئێوارە لە پەنای یەكێك لە دینگەكانی باڵەخانەیەكی شەقامی كەركووك، كۆرپەیەكی بە رەگەز كوڕ کە تەمەنی زیاتر لە مانگێكە دۆزرایەوە ، رێوشوێنەكان بۆ پاراستنی منداڵەكە دەستی پێكردووە، منداڵەكە بۆ نەخۆشخانەی ئازادی شاری كەركووك گواستراوەتەوە و لەلایەن یەكێك لە پەرستارەكانەوە چاودێری دەكرێت."
پەیامنێری رووداو گوتیشی: "لە ماوەی 4 مانگی رابردوودا ئەمە شەشەمین حاڵەتی فڕێدانی منداڵە لە شوێنە جیاجیاكانی شاری كەركووكدا."
پێداچوونەوە؛ عومەر شایان
به‌روار: 20/04/2017
1221 جار خوێندراوه‌ته‌وه
|