بەیتی ئاگر "چیرۆکە شیعر بۆ نەورۆز"
بەیتی ئاگر 
"چیرۆکە شیعر بۆ نەورۆز"

شێرکۆ بێکەس

ـ ساڵ نییە، پەل و پۆی، درەختی گڕگرتوو 
چراخان لە کەژ و دەربەندا ھەڵنەکا. 
ساڵ نییە ئەو گڕە چیرۆکێ بۆ عەشقی 
کاوەیەک نەنووسێ و 
بۆ مەرگی زوحاکێ 
دۆزەخێ دانەخا. 
ساڵ نییە.. ئەو گڕە ماڵ بە ماڵ نەگەڕێ و 
دەستی یاد بە سەری 
نەورۆزدا نەھێنێ 
ساڵ نییە.. پشکۆی ئەو.. ئەژدیھا کوێر نەکا و 
تاریکی ڕاو نەنێ. 
ئەم "بەیت"ی ئاگرە، پشتاوپشت، 
دەماودەم ھاتووە 
ھەر جارەی بە ئێسکی، 
کوڕێک و کچێکی "ئاسنگەر" 
بڵێسەی خۆش بووە 
دە ئێستەش گوێ بگرە 
بۆ بەیتێک لەم بەیتی دێرینی ئاگرە: 
* * * 
سەردەمێک بوو 
دنیای تاریک و نووتەک 
وەک ئەشکەوتی 
قووڵ و نسرمی بەسام 
چۆکی ڕەشی دادابوە سەر: 
گوند و شار و 
ڕەز و دێبەر و شەقام.. 
گوڵە گەنمی چاو بەسەوزیی ھەڵکۆڵراو 
کوژراوی ناو برسێتی و قات و قڕ بوو 
ماڵی ھەژار 
لە خەم سیخناخ 
کوانووی ھەژار 
بێ پشکۆ و سارد و سڕ بوو 
ھەر دەستەیەک.. لەدابەستەی ئەستەمووڵ 
کۆشکیان پڕ و.. ورگیان پڕ و 
بەدەماغ. 
ناو ماڵیان پۆشتەو پەرداخ. 
ئەو سەردەمە.. نەھەنگەکان 
نەھەنگی والی و سوڵتان 
بەسەرچاوە و.. بەر ڕووباری، 
ئاوی ژینی کوردستانیان گرتبوو 
ژەندرمەکان: مۆتەکەی ترس 
سواری سنگ و سواری دەنگ و.. 
دەس بە نێزە سەرشەقام و 
ناو کۆڵانیان گرتبوو 
ئەوەی دەنگی لەبەر دەمی 
ژەندرمەدا ھەڵببڕیایە 
ئەوەی لە سەگی سوڵتانیش یاخی بووایە 
ئەوەی دەستی بۆ خەنجەری، 
بەرپشتێنی ببردایە.. 
زوو لە چینی ناو دیواریان گرتبوو. 
* * * 
ئەو دەمە، زستانی، شەوێکیان 
وەیشوومە و بەفرانبار 
زریانی بەلوورە ئاسمانی تاریکی، 
لوول ئەدا و لە گڤەی پڕتاوی 
مێگەلی پەڵە ھەور 
ئەترسا و ڕای ئەکرد 
بەرە و ژوور بەرە و خوار 
سەری خۆی ھەڵ ئەگرت. 
وژەی ناو دارستان 
ڕێ و بانی چۆڵ و ھۆڵ 
کەناری زێی ھەڵچوو 
لێشاوی ملگرتوو 
بەرە و ناو شیو و دۆڵ 
خەرەندەی بەھاژە و توڕەبووی 
کەف کردووی بێ سروشتی 
ترساو بوون 
ئەو شەوە "ڕەواندز": 
ژنێکی غەمگین بوو 
لە نوێنی شەختەدا نووستبوو 
ئەو شەوە.. لە ژووری ماڵێکی 
قوڕینی بنمیچ و گوێسەوانە نزمدا 
قوتیلەکەی بەدووکەڵ، 
تەواو ڕەش.. داگەڕاو، 
ئەسووتا و شەوقێکی زەردباوی 
ئەدا لەڕوخساری غەمگینی 
دوو برای "پیرباڵ و کاکە لاو" 
دوو برای وەرزێڕی پێستی لەش 
وەک بەڕووی ناو ئاگر ھەڵقرچاو 
دوو برای بەرچاو ڕوون، 
کاغەزنووس بەحەرفی حوجرەکەی 
لای.. مەلا. 
دوو برای داخ لەدڵ 
بۆ تۆڵەی باوکێکی بە دەستی، 
ژەندرمە تا سێ ڕۆژ، 
لەچەقی مەیداندا 
سەرەو خوار.. ھەڵواسراو. 
ئەو شەوە.. جووت برا 
بەڵێن و بڕیاری 
دوو کاری زۆر گەورە و 
سامناکیان بەیەک دا: 
* * * 
ـ مانگێکی تر، زستان وەکوو، پیرەمێردێ 
دەم و دانی ئەکەوێت و.. 
سەری لە گوێ قەبر ئەلەرزێ 
مانگێکی تر سەرما ئەمرێ 
گوڵی کێوی 
بەلاسکی پەنجە سەوزەکەی 
بەفر لەسەر خۆی لا ئەدا و 
دوور و نزیک 
چاو لە شوانی گوند دائەگرێ 
بەھار دێت و لەدەرگای 
حەوشەمان ئەدا و 
ئەگری و ئەڵێ 
کێ بێ گڕی کوژاوەی چاوەکانی من 
ھەڵکاتەوە و تاسەر لووتکەی دەسم بگرێ؟! 
کێ بێ نەورۆزی زیندانیم، 
ئازاد بکا و 
بە دەنگی بەرز 
لاوکی سوورم بۆ بڵێ؟ 
ئەی گڕی جەژنە سەوزەکەم 
بەڵێن ئەدەم من ئەو کەسەم 
مانگێکی تر لەسەر بانێژەی ماڵەکەم 
ئەتکەمەوە و لەبەر چاوی: 
ژەندرمەکان 
کڵپەت ئەگەیێنمە ئاسمان. 
ـ یاخی بوونە لەتاریکی 
خەنجەر کالان بەجێ دێڵێ 
شەختەی بێدەنگیی ئەشکێنم 
ئەو وەختەی تۆ 
ئاگر ئەکەیت بە گژ شەوا 
منیش ئەچم..بێ ترس ئەچم 
لەسەر قەدە ئەستوورەکەی 
سوورە چناری گۆڕەپان 
بەکوێرەخەتی ـ دەس خەتم ـ 
بە گەورەیی، ناوی ـ کاوە ـ و 
وێنەی چەکوشەکەی دەستی 
ئەنەخشێنم 
دەور و بەری سوورەچنار 
وەک ڕۆژ ڕووناک ئەکەمەوە 
بە ھاواری کاوە و نەورۆز 
ئەم سەر ھەتا ئەوسەری شار 
ئەخرۆشێنم 
* * * 
ئەو مانگە تێ پەڕی و زستان مرد 
دوو برای دەرون پڕ 
لەسەر تێز چاوەڕوان 
گفتاریان شەقاوی ھەڵھێنا 
بۆ بڕیار ئەنجام دان. 
ئەو ساتەی..زەردەپەڕ، 
لەھەوری مەیلەوئاڵ 
کەژاوەی ئێوارەی بۆ جوانی 
کرد بەماڵ. 
ئەوساتەی ناو باخ و بێشەڵان 
بە دوا تیشک، 
سەر لق و گەڵایان ھەزاران ڕەنگیان گرت 
ئەو ساتەی.. ئاوێتەی ڕووباری 
لەدوور دیار 
بریقەی بەشەوقی گڕێک ئەیدا 
لەچاوی بن بنار 
ئەوساتە..کاکە لاو 
لە حەوشە لەھەیوان 
لە چیلکە و چەوێڵ و بڕەدار چی ھەبوو، 
بەباوەش سەری خست بۆ سەربان 
لیژنەدار لەسەریەک 
ئەوەندەی باڵای خۆی 
کۆمەڵ بوو.. 
بۆ ئاگر تێ بەردان بنەوەی پووشوو بوو 
لەسەر چۆک دانیشت و، 
پزیزکی "بەردەستێ" 
پووشووی گرت 
تەنێوە..تەنێوە..تاسەرێ 
بڵێسەی بەلرفە و بەشاڵاو 
چناری ئاگر بوو 
تا ئەھات بەرە و ژوور، 
ھەڵ ئەچوو. 
خرۆشا ناو شاروو.. 
ھەر، سەربوو. 
لە دەرگا و پەنجەرەی ماڵەوە.. 
ھاتنەدەر.. دەنگە دەنگ 
چی ڕوی دا؟ چی قەوما؟ 
شڵەقا گۆمی مەنگ 
وەک لاولاو 
ئاگری نەورۆزی کاکەلاو 
لە شاردا دەست نەما سەرنجی، 
لە باڵای نەئاڵێ 
وەک پشکۆش 
دڵێکی ڕەش نەما 
بەچزەی ئازاری، 
تا سەر ئێسک کونکەری، 
تل نەداو نەناڵێ. 
* * * 
لەو لاش پیرباڵ وەک سمۆرە 
بەقەدی لووسی چناردا ھەڵگەڕابوو 
لەسەر لقێکی دووفاقە ھەڵکورمابوو 
بە کوێرە خەتی ـ حوجرەی کۆن ـ 
بە حەرفی گەورە و خوار و خێچ 
نووسی: کاوە 
نووسی: نەورۆز 
لە پاڵیدا وێنەی چەکوشێکی کێشا. 
بە دیمەن ئێجگار ناقۆڵا 
بەکوێرە خەت بوو بەئاڵا.. 
کە ھاتە خوار.. ئەمیش لەسەر: 
سەکۆ گەورەکەی گۆڕەپان 
بەرامبەری باڵە خانەی تەختەبەندی 
جێگرەکەی والی و سوڵتان 
داروباری کۆ کردەوە 
ئاگرێکی وەک ئاگرەکەی 
کاکەلاوی لێ کردەوە 
کاتێ بە دەم کزەی باوە 
کە شەوقی ئاڵی کڵپەدار 
ئەیدا لە باڵای بزورگی سوورە چنار 
ناوی نەورۆز.. ناوی کاوە 
وەک مانگی ناو پەڵە ھەور 
جارە ناجار.. 
ون ئەبوون و دەر ئەکەوتن 
بەسەر پەیژەی بڵێسەدا 
بۆ کوشتنی تاریکە شەو سەر ئەکەوتن 
* * * 
شار ڕاچڵەکی 
کۆڵان.. کۆڵان.. گەڕەک.. گەڕەک 
دەرگای حەوشەی خڕ داخراو 
کەوتنە سەر پشت 
ھاتنە دەرێ ورد و درشت 
وەک گۆمی مەنگ 
خەڵکێکی زۆری حەپەساو 
لەدەوری ماڵی کاکەلاو 
لەدەوری سوورە چنار و 
سەکۆی گەورە 
ئەڵقەیان بەست.. خڕ بوونەوە 
چاوێکیان کرد بەچوار چاو و 
ورد بوونەوە.. 
ھەر سەر بوو ئەنرا بە سەری 
تەنیشتەوە.. 
چرپەی پەنا گوێی نەھێنیی 
سەر سوڕھێنەر 
لەم پەڕەوە ھەتا ئەو پەڕ 
یەکە.. یەکە.. ئەڕۆیشت و.. 
ئەگەیشتەوە.. 
دوو ئاگرەکەی 
جووتە برا 
لەژووری دڵی تاریکی 
ئەو خەڵکەدا. 
بوون بەچرا. 
* * * 
ئەم ھەواڵە گڕ گرتووە 
وەختێ فڕی و خۆی کرد بەناو 
سەرا و قشڵەی ژەندرمەدا. 
ڕاڕەو و داڵانی تاق، تاق.. 
دوور و درێژ 
پێکدا ئەھات.. جمەی ئەھات 
تەقەی پاژنەی خێرای پۆستاڵ، 
بن بزمارڕێژ 
جیڕە جیڕی دەرگای ژوور و 
قڕە قڕ و.. کۆکە کۆک و.. 
بانگ کردن و "جنێودانی " 
کوردی و تورکی و.. 
شڵەژان و سەرسم دان و ژاوەژاویان 
لە گێژەنی ترس و بیمدا 
بۆ خوێن ڕشتن 
پەنگی ڕقیان ئەخواردەوە 
* * * 
لە بنەبانی داڵانی سەرەوەشدا 
لەژوورێکی فراوانی بنمیچ بەرزی 
پڕ قەنەفە و پڕ فەرشدا 
لەسەر کورسیەکی کەتەی 
پاڵپشت و دەسک نەرمدا.. 
ڕوو لەپەنجەرەی بەپەردەی 
ئەتڵەسی سەوز داپۆشراو 
نزیک کوورەی ناو دیواری 
بەحاڵ گڕ لەپشکۆ ھەستاو.. 
جێگرەکەی والی و سوڵتان 
پەپاغ لە سەر 
برۆ پڕی.. لچ ئەستووری.. 
دان ئاڵتوونی..ڕوخسار ترشاو.. 
دانیشتبوو. 
لەناوەڕاستی ژووریشدا 
سەرەک ژەندرمەی ورگ زل 
چوار پەل قەوی.. کەللە بەران 
ڕاوەستابوو.. 
نقە و ھەناسەی لە سنگی، 
خۆی بڕیبوو 
گوێی بۆ فەرمانی سەرکردەی 
دەم کەف کردوو 
ڕاگرتبوو.. 
ـ تۆ پێم بڵێ لە کەیەوە 
بۆرەپیاوی ئەم شارە 
وایان لێ ھات لەفەرمانی 
"بابی عالی" یاخی بن؟! 
چۆن توانیان.. چۆن ئەوێرن 
وا بێ‌باک.. 
دەست بۆ مشتووی 
خەنجەری تۆڵە بەرن؟ 
ئەی ئێوە چین.. 
بەردن.. دارن.. 
بتن.. کەرن.. بارگیرن؟ 
ئەوەتا وا ئاگرپەست 
نەوەی شەیتان.. دز.. جەردە 
بەئاشکرا بەر دەروازە و 
ڕێی سەرامان پێ ئەگرن! 
ئاگر و دووکەڵ ئەکەن بە گژ 
پەڕە و حەرفی قوڕئاندا 
شیر ھەڵئەبڕن 
لە ڕووی پایە و 
تەخت و بەختی سوڵتاندا! 
گوێم ڵی بگرە! تا چوارمێخەی 
ئاگر پەرست نەکێشن 
من نامەوێ جارێکی تر 
دوور و نزیک بمبینن!! 
* * * 
ھەر ئەو شەوە ژەندرمەکان 
وەکوو کوللە، وەک واشە 
دوو دوو..سێ سێ 
دەس بە سونگی، بەپڕتاو 
ڕژانە ناو گۆڕەپان و سەرشەقام 
ڕێگەی پرد و باخ و چەم و 
دەوری شار و قوتکەی بەرز و 
یاڵیان گرت.. 
ھەر ئەو شەوە..ھێشتا گڕی 
ئاگرەکەی جووت برا 
لەسەر بان و گۆڕەپاندا ئەسووتا 
کە گەیشتن فێ‌گرتووانە، 
شێت و ھار 
بە پێ‌لەقە.. بەسەتڵە ئاو 
گڕی ئاگر و.. بڵێسەیان 
تەواو دامرکاندەوە.. 
بەدەم نووکە شەقی قین و.. 
بوغز و.. جنێو دانەوە. 
پەرش و بڵاو.. 
سەرە بزوتک.. کەڵە پشکۆ. 
لەجێی کڵپە.. دووکەڵیڕەش 
پێچاو پێچ! 
سەری خەم و نوشوستی خۆی 
ھەڵ ئەگرت.. 
دەنگ و باسی دوو ئاگرەکە و 
جوت برای 
بۆ ھەوری سەر ئاسۆی دوور و 
بە ھەواری کۆچەرەکان.. 
ئەگەیاند 
ھەر ئەو شەوە..لەپشتەوە 
باڵی جووت برا.. بەستران 
بەدەم زرمەی شەق و دۆنکی و.. 
تێڵاوە.. 
لەش خوێناوی بۆ زیندانی 
شەوەزەنگ بران. 
بە فەرمانی پەپاغ لە سەر 
جاڕچی ھات و 
جاڕی ئەدا: 
ماڵی پیرباڵ و کاکەلاو لەگەڵ ئەرزا تەخت کرا. 
شوێنەواریان کرد بە کولانە بۆ سەگ و 
توولە و تانجیی ماڵی پاشا. 
ھەر ئەو شەوە.. بە تەورداس 
کەوتنە وێزەی سوورە چنار 
لەڕەگەوە دەریان کێشا 
لەت لەتیان کرد 
کۆمەڵ.. کۆمەڵ 
بەشان بردیان 
بۆ دارەڕای تەویلەی نوێی 
قشڵە و سەرا 
ھەر ئەو شەوە درەنگانێ 
بەفەرمانی پەپاغ لەسەر 
جاڕچی پەپوو ھاتەوە دەر 
ئەمجارەیان جاڕێکی دا 
چزە و کسپەی لەدەروونی 
عاشقانی ئاگر ھەستان 
کە ئەیقیڕان: 
جووتە برا.. 
لەدار دران! 
* * * 
بەیانی کە شاری گریاوی 
قژ ئاڵۆز.. 
ئەستێرکی خوێنینی.. 
چاوانی ھەڵھێنا 
دوو سەری، 
بڕراوی خۆی بینی. 
بەیانی کە ھەتاو ڕێی کەوتە 
ناو شار و 
چووە سەر سەکۆکەی گۆڕەپان 
لەناکاو کەوت بەسەر، 
دوو لاشەی عاشقی پڕشنگیا و، 
زۆر گریا! 
ئەوەتا وا ئێستە 
بە دەرگای سەراوە 
پیرباڵ و کاکەلاو 
دوو جەستە و دوولاشەی 
سارد و سڕ چون بەفرن 
بەڵام بۆ جەژنەکەی دڵداران 
دوو گیانی سەوزن و 
دوو ھەڵۆی ئاگرن. 
ئەوەتا وا ئێستە شەماڵێ ھەڵیکرد 
بەپەنجە ئەسپایی 
کاکۆڵیان لا ئەدا و.. 
تەوێڵیان ماچ ئەکا 
ئەوەتا بەچرپە بۆ گەڵای درەخت و 
بۆ مەل و بۆ شەپۆل 
مەرگی سوور باس ئەکا 
ئەڕوات و سەر ئەکا بەھۆبەی 
ڕەوەندا.. 
ئاگریان خۆش ئەکا و ھەواڵی 
شارەکەی دوو برای 
نەورۆزیان پێ ئەڵێ.. 
ئەڕوات و جارە جارە چنارێ 
ڕای ئەگرێ 
شەماڵە و ئەم بۆنی کاکۆڵی 
ئەوانی لێوە دێ 
ئەوەتا وا ئێستە ھەورێکی 
زۆر چڕی ھێناوە 
ئەم ھەورە..لەدوورڕا 
ھاتووە و ماندووە.. 
ئەم ھەورە گێنگڵی 
ژانێکی بەتاوە.. 
ئەم ھەورە.. لە گڕی ئاگرەکەی 
جووت برا.. کەوتەوە 
لەو.. زاوە 
ھاتووە و بۆ دوا جار برایان ببینێ 
ھاتووە بۆ دوا جار دەمی عەشق، 
بنێتە ناو دەمیان 
ئەوەتا وا شوانی نوقم بووی. 
تا ئەژنۆ لە یادا 
بەرەو ژوور ئەڕوات و 
قۆڵی کردووە بەقەفی 
گۆچانی سەرشاندا.. 
ھەنگاوی خەماویی 
وەردی تەڕ ئەشێلێ 
ئەو ئەڕوا و پەلکە گیای بەر باران، 
لاسک جیڕ، دێتەوە شوێنی خۆی، 
بێ ئەوەی نیشانەی ڕێگەیەک جێ بھێڵێ. 
ئەوەتا ورد ئەڕوا و 
گۆرانیی بارانە بۆ کۆچی سوور ئەڵێ. 
"باران بارانە، ھۆرەی بارانە 
ھۆرە بۆ کۆچی سووری یارانە 
باران بارانە شەستە بارانە 
چاوی ئەو کەژە زنەی گریانە 
باران بارانە ڕیزە بەڕیزە 
ئەوەتا چاومان وا لە ئازیزە 
باران بارانە نەرمە بارانە 
کۆچی بێ وادەی سووری یارانە، 
* * * 
ڕۆژ ھات و چوو 
کارەساتی جەژنی کوژراو 
سیمای پیرباڵ و کاکەلاو 
ون نەئەبوون لەخەیاڵدا و.. 
جێیان نەھێشت سۆمایی چاو 
لەناو ژووردا 
لە ھەیوان و حەوشەدا 
ئەبینران ئەھاتن ئەچوون. 
لەکێڵگەدا 
تۆویان ئەچاند.. 
ئاوی جۆگەیان ھەڵ ئەگرت 
لەگەڵ منداڵی گەڕەکدا.. 
ڕایان ئەکرد..بازیان ئەدا..پێ ئەکەنین. 
شەوی ھاوین 
لەنێو پەل و نێوان گەڵای درەختەوە 
مانگ..دەم و چاوی ئەوان بوو 
لێو بەخەندە.. دەر ئەکەوتن. 
شەوی پایزیش.. لەخەونی 
ئاشنا و ڕۆشنا و ھاوڕێدا. 
گەلێ جار ئەبوون بە دوو مەل 
باڵیان سوور و 
بەر سنگ سەوز و 
لەسەر بەفری دوورە لووتکەی
بەر زەردەپەڕ.. ھەڵئەنیشتن. 
* * * 
ئەگەر چی ئەو ساڵە 
ھەڕەشەی ئاگر و ئاسنی ژەندرمە 
بە پەت و مێخ کێشان 
بە زمان لە بندا بڕین و.. 
بە سونگی و بە قەمە 
مۆتەکەی ژیانی سەرسنگی 
خەڵکی بوون. 
تاقیبی بەردەوام.. 
چیتان کرد؟ لەکوێ بوون؟! 
بۆچی، چۆن؟ 
ئەگەرچی ھەندێ کەس.. 
بۆ پاشا بوون بە ورچ، 
بە مەیمون.. بە سەگی چوارچاو و 
لەشەودا.. خۆیان کرد.. 
بە خێو و.. جنۆکە.. بە درنج 
بەڵام ڕێی ھەتاوی 
پیرباڵ و کاکەلاو.. 
ئەو زەنگەی پار نەورۆز، 
لێیان دا. 
تاریکی نەیتوانی قووتی دا و، 
ھەڕەشە نەیتوانی کپی کا! 
* * * 
بەرداشی ساڵ سووڕا 
وا نەورۆز خەریکە جارێ تر 
سەر بدات و بێتەوە 
نزیکە.. کراسی گوڵاڵە لەبەر کا 
نزیکە دەسماڵی وەنەوشە، 
بەشانیا بدات و 
کڵاوی نێرگز و گەزیزە، 
لەسەرکا.. 
نزیکە و بە سەردان 
جووت برا دێنەوە 
ماڵ بەماڵ ئەگەڕێن تا جەژن، 
ئەڕوات و ئەوساکە، 
ناوەستن.. ئەچنەوە! 
* * * 
بە دوو ڕۆژ پێش ئەوەی 
کە نەورۆز بێتەوە.. 
لەشاردا..ماڵە و ماڵ.. 
بانگێکی نەھێنیی.. دەماغ و 
دەمامک.. ھەڵبەستوو.. ئەگەڕا 
بانگ وەکوو ھەرێز وپەڵە ھەور 
تەنێوە.. 
بانگ ئەی وت: 
بۆ ئەوەی کە نەورۆز 
بڵێسەی بەرزتر بێتەوە و..نەکوژرێ 
با چاوگی ئەو گڕە "بیرمان "بێ 
بۆ ئەوەی درەختێ کە ناوی کاوەی 
لەسەر بێ و بمێنێ.. با ڕەگی ئەو دارە 
بنج بەستی.. دڵمان بێ.. 
بۆ ئەوەی.. کە گیانی پیرباڵ و کاکەلاو 
شاد بکەین 
باھەموو.. ھەر ھەموو 
ببینە ھەزاران پیرباڵ و کاکەلاو 
تا بچین بە باوەش 
ھەتاو و نان و گوڵ بێنین و 
بیدەین بە، ھەژاری ڕەنج خوراو. 
کەژاوەی ئێوارەی نەورۆزی 
سەوز ھات 
ھێشتا خۆر چەند ڕمێ 
بەرزتر لە کەنار خۆرنشین، 
وەک دەمی تەندوورێ ئەسووتا 
شار کڕ بوو. بێ دەنگی گۆمێک بوو 
زۆر سامناک 
ھەر کە خۆر یەک دوو ڕم 
چووە خوار 
ئەنگۆرە دەرکەوت و تاریکی، 
حوچێ بوو بازی دا و بە گوڕ ھات. 
ئەو ساتە بێدەنگی تەقییەوە.. 
لەناکاو..لەجیاتی دوو ئاگر 
ھەزاران ئەستێرەی ئاگر و 
مانگ لە سەر، سەربانی 
شار ھەڵھات.. 
بانێژەی ماڵ نەما.. 
ھەورەبان.. سەرقەڵا.. سەرومەز 
گۆڕەپان.. ناوکۆڵان.. گردەکەی سەر قەبران، 
قوتکەکان.. نزم و بەرز.. 
شوێن نەما 
کە کڵپەی ئەم ئاگرە پیرۆزە 
بۆی نەبێ.. بەچرا 
لەشاردا.. قەدێکی درەخت و دار نەما 
گەورە بێ.. یان پچووک 
باریک بێ.. یان ئەستوور 
چنار و.. دارەبەن.. دار بەڕوو 
دار مازوو 
شۆڕە بی.. گوێز و توو.. 
بەنووسین.. یان وەکوو نیشانە 
بۆ کاوە.. بۆ نەورۆز 
نەبێ بەو مژدەیەی 
پێش وەخت نێرگزی 
ئەمڕۆژەی میوانە! 
جائیتر.. پاشا و بەگ 
ژەندرمە.. چی ئەکەن؟ کێ ئەگرن؟ 
چەند ئاگر خامۆش کەن؟ 
چەند درەخت لەبندا ھەڵکەنن؟ 
ئەوەتا وا لەپاڵ ھەزاران ئاگردا 
ھەزاران پیرباڵ و کاکەلاو 
ئەو ئاگری نەورۆزە خۆش ئەکا.

ڕووبار

به‌روار:  19/03/2017
456   جار خوێندراوه‌ته‌وه
  بابه‌تی زیاتر ...
ئیستانبوڵ - AA سەرکۆماری تورکیا، رەجەب تەیب ئەردۆغان لەبارەی گشتپرسییەکەی هەرێمی کوردستان و گرتنەبەری رێوشوێنی وڵاتەکەی لەمبارەیەوە گوتی: "ئیستا بە تایبەتی دەمەوێت شتێک بزانن. ل درێژه‌ ...
عه‌بدولوه‌هاب شوانی‌، به‌ "فڕین" هه‌موو كیشوه‌ره‌كانی‌ بڕی‌ كورته‌ فیلمی‌ (فڕین-Frin) له‌سیناریۆ‌و ده‌رهێنانی‌ عه‌بدولوه‌هاب شوانی‌ وه‌ك تاكه‌ فیلمی كوردی و عێراقی له‌فێستڤاڵێكی درێژه‌ ...
دەوڵەتەكەمان چۆن بێت؟ ‌ د.شیركۆ عبدالله‌‌ مادام تەلەفزیۆنەكان ئەو هەموو ئارەقە شین و مۆرەیان بۆ دەوڵەتی كوردی دەرداوە، هەق وایە رازی نەبین دەوڵەتە چاوەڕوانكراوەكە وەكو ئێستای ه درێژه‌ ...
فه‌ڕه‌نسا ده‌ستپێشخه‌رییه‌كى نوێ له‌ باره‌ى ڕیفراندۆمى هه‌رێمى كوردستانه‌وه‌ دەکات، ئەو ولآتە پێشنیارێک دەخاتە روو کە عێراق له‌ فیدڕاڵییه‌وه‌ بگۆڕدرێت بۆ كۆنفیدڕاڵى. به‌پێی ه درێژه‌ ...
کورتەنامەی شیعریی بەشی شەشەم لەبەر باران مەگریێ ..باران دەشواتەوە ،فرمێسکەکانت گەر فرمێسکەکانت شۆرایەوە ەکانت، ناوەرێنهگونا بەتایبەتیی.. گوناهی .دڵی من ،شکاندنی *** درێژه‌ ...
قوربانییەکی شەڕی ناوخۆ بەناوی ڕۆستەم شەهید وەستا عەلی بەهۆی ڕەخنەگرتن لە پارتی و یەکێتییەوە لە تۆڕى کۆمەڵایەتى فەیسبوک ماوەی چەند رۆژێکە بێسەروشوێنە. ڕۆستەم شەهید وەستا عەلی لە درێژه‌ ...
وەزیری دەرەوەی سوید مارگۆت ڤالستروێم بە بەشی کوردیی ڕادیۆی سویدی ڕاگەیاند کە ئەوان لەو دەسترسن پرسی گشتپرسی لە هەرێمی کوردستان بۆ سەربەخۆی ببێتە هۆی تێکچوونی ئاسایشی ناوچەکە و ئاڵۆ درێژه‌ ...
شداریكدنی اكره م حه‌یده‌ر له‌ برۆزه‌ی كلتورهوست بلۆفیكن له‌ هانیغا كۆمۆن له‌ستۆكۆلم به دراستك دنیا 1.به‌یكه‌ری‌ كه‌له‌شیر ی كیوت كه‌ره‌مزی‌ شاره‌وانی‌هانیغه‌یه‌.2.به‌شداری وهاوبه‌ش درێژه‌ ...
دۆناڵد ترامپ ڕێكه‌وتنه‌كه‌ی‌ تایبه‌ت به‌ په‌نابه‌رانی‌ جێبه‌جێ كرد سه‌رۆك وه‌زیرانی‌ ئوسترالیا پێشوازی‌ له‌و ڕاگه‌یاندنه‌كه‌ی‌ وولایه‌ته‌ یه‌كگرتووه‌كانی‌ ئه‌مریكا كرد كه‌ تایبه‌ت درێژه‌ ...
هیچ گومانی تێدا نییە، گەلی كوردستان خاوەنی مافی دروستكردنی دەوڵەتی سەربەخۆی خۆیەتی. بێ دوودڵی دەنگی من و هاودیدەكانمان، لەگەڵ دەنگی زۆرینەی گەلی كوردستان، بۆ سەربەخۆییە. بەڵام دەس درێژه‌ ...
ژماره‌ی بابه‌ت
مافەکان پارێزراوە بۆ مالمۆکورد
میوانی سه‌رهێڵ:   307
کۆی سه‌ردان:   15643024