|
من ناوم (بیست و پێنج ) هەزاریە
هێمن عەبدولقادر
ئەم کاتەتان باش
من ناوم (بیست و پێنج ) هەزاریە و
وا نزیکەی دووساڵە من یاخیم لە گیرفان و
لە دەست و لە گەرووی هەموو خەڵکێک ...
ئەوەی کە من ئەبینێت هەر سنگی نەرمی
سەماکاری شەوانەی باخەکانی قەراغ شار و
هەر قاپە ویسکی سەرمێزی هەڤاڵی شاخ و
چەند دانەیەکیشمان بەو پەڕی روو زەردیەوە دەچینە گیرفانی
ڕاپۆرت نووسێک ..
من ناوم بیست و پێنج هەزاریە و
بیست و پێنج ساڵە ، ئەم شارنەوە و
لەم ژێر زەمین و بانقەوە بۆ هەورەبان و قاسەی ئەوماڵ
دەم هێنن و دەم بەن ،
نە منداڵێکی هەژار توانی لەگەڵ بچکۆلەکانی من
یاری بکات و
نە کرێکارێک سێڵفیەکی لەگەڵ گرتم و
نە پێشمەرگەیەک دامی بە قوتوویەک شیر ....
لەوەتەی هەم ئەمدەن پاوپوزی ساف و
بە فیشەکێک بۆ ناودەمی قەڵەمێکی یاخی و
بە سەری نێزە و بە خەنجەر و بە تیر ..
من ناوم بیست و پێنج هەزاریە و
بیست و پێنج ساڵە دەڵێن ئەمڕۆ نا سبەی ئەگەڕێمەوە و
دەبمە بوکە شوشەی دەستی منداڵێک کە باوکی لەسەر قازێک کوژرا
بیست و پێنج ساڵە دەڵێن ئەمڕۆ نا سبەی ئەگەڕێمەوە دەبمە
دار چوالەی شیرین تا دوو عاشقی لە خێڵ یاخی بێن و
لە بن مندا بەدەم بەستەی (هەی بەلار و بەلار) ەوە ،
بۆ هەتا هەتایە روو لە عەشق و پشت لە نیشتمان بکەن
بینیویانە
ئەڵێن لە نێوان سنگی گۆرانی بێژێکی لوبنانیدا لە پایتەخت بینیویانە
نامەیەکی ناردووە و بە نهێنی نوسیوویەتی :-
ئەگەڕێمەوە ، دڵنیابن هەر ئەگەڕێمەوە
ئاخر بۆ نەگەڕێمەوە
کە ( ڕیشە ) لەو لەیلانە تفەنگەکەی فڕێ بدات و بگەڕێتەوە
ئیتر من بۆ نەیەمەوە ؟؟
کە مەلا عەلی لە زیندانی موسڵ قەلەمەکەی فڕێ بدات و واز لە
(برا دور و خزم دور و کەسم دور) بهێنێت و بگەڕێتەوە
ئیتر من بۆ نەیەمەوە ...
ئەگەڕێمەوە ، دڵنیابن ڕۆژێک هەر دەگەڕێمەوە
بۆ ناو دەست و بۆ ناو دەم و بۆناو گەرووی تفت و تاڵی منداڵێک
کە لەگەڵ یەکەم ساتی لەدایک بونیدا
باوکیان لە سەر رەنگی کراسەکەی کوشت .
..................................................................
لە قەصیدەی (ئێستا بیست و پێنج هەزاریەک نیشتمانمە )
پەیجی شاعیر
به‌روار: 31/05/2016
877 جار خوێندراوه‌ته‌وه
|