|
13 بنكەی سەربازی و (3235) ئەفسەر و جەندرمەی تورك لە دهۆکن
پەرلەمانتارێكی عیراق لەسەر فراكسیۆنی یەكێتی نیشتمانیی كوردستان، ژمارەی سەربازە توركەكانی لەسەر خاكی هەرێمی كوردستان و بنكەكانیان و ژمارەی چەك و كەرەستە سەربازییەكانیان، ئاشكرا دەكات.
محەممەد حاجی عوسمان، ئەندامی ئەنجومەنی نوێنەرانی عیراق، لە ئەكاونتی خۆی لەسەر تۆڕی كۆمەڵایەتی فەیسبوك، بابەتێكی لە ژێر ناونیشانی "ئایا ئێوەی بەڕێز دەزانن" نوسیوە و و تیایدا زانیاری لەسەر ژمارەی بنكە و سەربازە توركەكانی سەر خاكی هەرێمی كوردستان، بڵاوكردووەتەوە.
ئەو پەرلەمانتارە، نوسیویەتی : لە هەرێمی كوردستان (13) بنكەی سەربازی و (3235) ئەفسەر و سەرباز و جەندرمەی تورك بونیان هەیە و سەرجەمیان لە پارێزگای دهۆكن.
ئەوەش دەخاتەڕوو، كە ئەم هێزە دابەش بوون بەسەر ناوچەكانی (باتوفە، كانی ماسی، بامەڕنێ، سینگی، كریبی، سیریی، گەلی زاخۆ، سیرتی، كوبكی، كمری، كوخی سپی، دەرەی داواتیا و سەری زیری).
هەروەها چەك و كەرەستە جەنگییەكانی ئەو هێزانەش ئاشكرا دەكات كە بەپێی زانیارییەكانی ئەو، بەم شێوەیەن: 58 تانك، 27 زریپۆش، 31 تۆپ، 26 هاوەن، 17 (R.B.G)، 10 دۆشكا، 40 ئۆتۆمبیلی سەربازی، 10 (B.K.C)، 2 نازووری شەوانە ، 3 نازووری قاعیدە، 10 قەناس، 1 بۆمبی ئەتار، 4 موبایلی سوورەیا، 2 جیهازی راكاڵ لەگەڵ 1 رەسەد و 2 ڕافیعە و جیهازێكی پێشكەوتوی دەنگ هەڵگر.
محەممەد حاجی عوسمان لە كۆتایی نووسینەكەیدا، دەڵێت : جێی خۆیەتی و جێی ئاماژەیە، هەردوو پەرلەمانی عیراق و كوردستان یاسا و بەیاننامەیان دەركردووە لە مەڕ نەمانی ئەو هێزەی توركیا لە خاكی عیراق و هەرێمی كوردستان، بەڵام ماونەتەوە.
خەندان
به‌روار: 30/07/2015
1266 جار خوێندراوه‌ته‌وه
|