|
دیمەنێک لە چیای شنگاڵ
*
کامیل ژیر
*
هەرچی بڵێم بۆ شنگاڵ و بۆ داستانی چیای شنگاڵ
ناکاتە گریان و شین و هاواری دایکی یەک منداڵ
ئەوە زارۆکی ساوایە، بێ شیرو ئاو
لەبەر گڕەی چلەی هاوین، لەبەر هەتاو
ئەبرژێت و لەگەرمانا بێ گڕوگاڵ، نووزەی نایە
ئەسووتێت و لەبرسانا زمانی لاڵ، ناڵێ دایە
تەنیا بە چاو
نیگای شێواو
ئەپرسێ بۆچی بەمجۆرە
سزام ئەدەن لەم بەرخۆرە!؟
بزنەڕیشێ بە پای پەتی
تێر پێکەنی و ئنجا وتی
نازانی بۆ وەها مردی!؟
هەم زەردەشتی و هەمیش کوردی
***
ئەی دایکەکان
ئەی باوکەکان
براو خوشکان
هەموو بەشمان
سووتاندن و سەربڕینە
چاری ئێمە راپەڕینە
سا راپەڕن ، راپەرینێکی دەستوبرد
بۆ بەرگری لەکوردستانی دایکی کورد
بۆ ئازادی و سەربەخۆیی سەرتاپاسەر
بۆ هەستان و شەبەیخوونی دوژمنبەدەر
10/8/2014
--------
به‌روار: 18/08/2014
391 جار خوێندراوه‌ته‌وه
|