|
پەیکەری یارمەتی هەژاران بە ئەڵمانی(Armenpflegedenkmal)
شوان کەمال
شاری فوپەرتاڵ (Wuppertal)لە هەرێمی نۆڕدڕاینڤیستڤاڵن لە ئەلەمانیا،شارێکی کۆنی مێژویی و کلتوریە،گەلێك مۆزەخانە و ئەتەلی و گەلەری هونەری تێدایە،هونەرمەندی بەریتانی مەزن(Tony Gragg)لەم شارە دەژی،بێجگە لە ئەتەلیەکەی خاوەنی پارك و باخچەیەکی گەورەیە زۆربەی پەیکەرەکانی لەوێ نمایش کراوە،گەشتیاران و هەوادارانی هونەری پەیکەرسازی لە هەمو جیهانەوە ساڵانە سەردانی ئەکەن.
فوپەرتاڵ تا ئەم ساڵانەی دوایش یەکەم شاری جیهان بوە کە خاوەنی شەمەنەفەری هەڵواسراوبوە(Schwebebahn Wuppertal)
،واتە شەمەنەفەر لە جیاتی ئەوەی لەسەر زەوی بڕوات بە ئاسمانەوە کاری خۆی ئەکات.
شتێکی تری ئەم شارە ئەوەیە کە خاوەنی کۆمەڵێك پەیکەری مێژوییە،زۆرێکیان بە دەستی هونەرمەندی پەیکەرسازی کورد شوان کەمال دروستکراوە،لەوانە پەیکەری یارمەتی هەژارانە.
چیرۆکی ئەم پەیکەرە لەوەوە سەرچاوەی گرتوە کاتێك ناپلیۆن ئەوروپا داگیرئەکات پاش کشانەوەی برسێتی و هەژاری بەدوای خۆیا ئەهێنێت،زۆربەی شارەکانی ئەڵمانیا ئەگرێتەوە،شاری فوپەرتاڵ لەو کاتانەیا وەزعی باشتر ئەبێت،خاوەنی کۆمەڵێك کارگە و بازاڕ ئەبێت ئاست و رادەی هەژاری کەمتر ئەبێت بۆیە خەڵکێکی زۆر رو لەم شارە ئەکەن،کەسانێکی زۆر بێ لانە و هەژار لەناو شارا پەیا ئەبن،دیارە رێژەی دزی و پیاوخراپیش زیاد ئەکات،بۆ ڕێگرتن لەم دیاردانە و بۆ یارمەتی ئەم جۆرە کەسانە چەند دەوڵەمندێکی شارەکە بە یارمەتی کەنیسە بیر لەوە ئەکەنەوە شوێنێك دروستبکەن بۆ حەوانەوە لەگەڵ پێشکەشکردنی پۆشاك و خواردەمەنی رۆژانە بۆ لێقەوماوان و هەژاران.
پەیکەرەکە پێکهاتوە لە دو فیگەر،پیاوێکی بەتەمەنی هەژارلەسەر بەردێك دانیشتوە ئافرەتێکیش بە تەنیشتیەوە قاپێك شۆربای گەرمی پێشکەش ئەکات،لەسەر بنکەیەکی بەردی مەڕمەر دانراوە بە بنکەی پەیکەرەکەوە پۆترێتی دەموچاوی سیان لەو کەسایەتیانە هەڵواسراوە کە ڕۆڵی سەرەکیان هەبوە لەم یارمەتی و پرۆژەیەدا.
پەیکەرەکە لە کەرەسەی برۆنز دارێژراوە بە بەرزی نزیکی ٥ مەتر بە بنکەکەیەوە لە ناوەراستی شاری فوپەرتاڵ لە كێرشن پلاتز دانراوە بەرهەمی ساڵی ٢٠١١ ی پەیکەرسازی کورد (شوان کەمال)ە بە سپۆنسەری خەڵك و شارەوانی شاری فوپەرتاڵ لەگەڵ لایەنی جێبەجێکار کارگەی دروستکردنی پەیکەر بە میتاڵ(Rolf Kayser)ە لە شاری دۆسلدۆرف لە وڵاتی ئەلەمانیا دانراوە.
شایانی باسە شوان کەمال ناوی خۆی لەسەر ئەم پەیکەرانە بە پیتی کوردی و ئەلەمانی هەڵکۆڵیوە.
سەرچاوەکان
https://de.wikipedia.org/wiki/Elberfelder_Armenpflegedenkmal
https://de.wikipedia.org/wiki/Schwan_Kamal
https://www.youtube.com/watch?v=RMgjdAQwyfE
https://www.youtube.com/watch?v=7jLMVjfCf-4
https://www.youtube.com/watch?v=zFvETIogLRM
به‌روار: 04/12/2020
710 جار خوێندراوه‌ته‌وه
|