کەبوویت بە سەرۆک کۆمار چاوێکت لێمان بێ😂
هەر ساڵی 1979 بوو جەیشێکی زۆر هێنرابونە ناوچەی شارباژێڕ و شەوانە لەو گردو شاخانە كەمینیان دائەنا . من و شەهید جەلالی حەمەی محەش ئەمانوویست فرسەتێکمان بۆ هەڵكەوێ و زەڕبەیەک لەدوژمن بدەین . یاخود لەکاتی ئاوهێنانی کانیەکاندا چالاکییەک بکەین و بۆمان ڕێک نەئەکەوت .
بەتەنها دوو کڵانشیكۆفمان پێبوو ژمارەشمان دووکەس بووین بۆ هەندێ چالاکی ئەو توانایەمان نەبوو .
جەیشەکە کەمێنیان لای گورگەیەرەوە دانابوو بەسوتفە سەربازێکیان لەکەمینەکەدا خەوی لێدەكەوێت و جەیشەکە ئەگەڕێتەوە بۆ قەیماسە ئەو بەجێ ئەمێنێ .
ئەویش شارەزانابێ و ملی ڕێدەگرێ بەهەڵە تاکو گەیشبووە گوندی عازەبان . بەڕێكەوت خوالێخۆشبووان بابە تایەرو سالاری حاجی قادر تازە هاتبوون بۆ دەرەوە لەگوندی عازەبان ویستبویان پشویەك بدەن و نانێ بخۆن، خەڵکی گوندەکە هاوارئەکەن جەیش هات ڕاکەن .
ئەوانیش یەک تفەنگیان پێئەبێ بەبابەتایەر ئەبێ و سەیر ئەکەن جوندییەك تفەنگێکی پێیەو بەرەو گوندی عازەبان دێت .!
لەسەرەتاوە وائەزانن ئەمە موقەدیمەی جەیشەکەیە تۆزێ دوور ئەکەونەوە . کەسەیر ئەکەن تەنها یەک جوندیە خوالێخۆشبوو بابە تایەر ئەگەڕێتەوەو بەعارەبی پێی ئەڵێ ( قیف ) . جواب ناداتەوەو هەر ملئەنێ بەرەو گوندەکەو تفەنگەکەشی دانەگرتووە لەشانی و بەرەو ڕویان دێ .
دوایی بەعەرەبی پێیدەڵێن چەکەکەت فڕێ بدە، ئەویش فڕێی ئەداو گرتوبویان و چەکیان کردبوو .
ناوی کازم بوو هەموو سەروگوێلاك و دەموچاوی جێگای شوخت و تەقەڵ و ئاسەواری شكاوی كۆن بوو لەسەری .
ئێمە هاتینە گوندەکە و گووتیان ئەم جوندییەمان گرتووەو بەشكم لەگەڵ خۆتان بیبەن . ئێمەش بردمان لەگەڵ خۆمان شەو لەدەرەوەی گوندەكان دەماینەوە بەشەهید جەلالم گوت دەستی ئەبەستینەوە گوتی : هیچیشی پێناكرێ بەڵام نەوەك سەلەیەكمان لێدات و بڕوات . دەستێكی و قاچیم ڕاست و چەپ بەستەوە بۆ ئەوەی زۆریش ئازاری نەبێت . بەیانی شەهید جەلال سەعاتێك خەریكی بوو ، بەهەردوو دەست بۆی نەكرایەوە .! گوتی بەخوا من بۆم ناكرێتەوە ئەگەر هەرخۆت بزانیت چۆنت بەستۆتەوەو بیكەیتەوە .
گومانمان هەبوو گووتمان نەوەک حکومەت ناردبێتی . بەڵام وادەرنەچوو بەعەرەبی گووتی : الحمدو لیلا ئانی خلصت من العسكریە . شوكور نەجاتم بوو لە سەربازی .
دوای چەند ڕۆژێک کاک نەبەزو شەهید مام هێرش و شەهید جەلالی عەلە ورگەو شەهید کاکە براو شەهید حەمەعلی بەرزنجی و شەهید عوسمان عەرەب وبەکر وڵاغلوویی و هەموو کەرتەکە گەڕانەوە حەمەی تەیب گووتی : من ئەم سەربازە ئەناسم .!
گووتم برا ئەمە جوندیەو خەڵکی جنوبە تۆ چۆن ئەیناسی .! گووتی بەخوا دیومە دوای قسەکردن تومەس حەمەی تەیب لە عەلوەکەی بەغداد حەماڵی پێ کردبوو كاتی خۆی،کەچوبوو میوەیان هێنابوو بۆ سلیمانی .
ئەویش گووتی چەند ساڵێک لە عەلوەی بەغداد حەماڵ بووم دوایی لای خۆمان مایەوەو ناردمان بۆ سەرکردایەتی . لەوێ بوو بەپێشمەرگە لای حەسەن نەقییب ئەودەمە حەسەن نەقیب موعارەزە بوو خۆی دانابوو ئینقلاب ببێ و ببێت بە سەرۆک کۆماری عێراق .
من و شەهید جەلال لە ناوزەنگ کەئەمان دی ئەمان گووت : کەبووی بەسەرۆک کۆمار ئێمەت لەبیربێ هەر بۆ سوعبەت ئەویش ئەی گووت کەلام شەرەف لەبیرتان ناکەم، هەروەكو ئەوانەی ئێستا وابوو درۆی دەکرد .
كەریم عەبدوڵا مارف
۳ـ۱۱ـ۲٠۲٠
بهروار: 03/12/2020
819 جار خوێندراوهتهوه
|