|
وەزیری دەرەوەی ئەڵمانیا سەردانەکەی تورکیای هەڵوەشاندەوە
وتەبێژی وەزارەتی دەرەوەی ئەڵمانیا رایگەیاند، وەزیری دەرەوەی ئەڵمانیا سەردانی قوبرس و یۆنان دەکات بۆ گفتوگۆکردن لەبارەی ناکۆکییەکانیان لەگەڵ تورکیا.
ئەمرۆ دووشەممە، وتەبێژی وەزارەتی دەرەوەی ئەڵمانیا رایگەیاند، هایکۆ ماس وەزیری دەرەوەی ئەڵمانیا سەردانی قوبرس و یۆنان دەکات بۆ گفتوگۆکردن لەبارەی ناکۆکییەکانیان لەگەڵ تورکیا لەسەر گەڕان بەدوای گازی سروشتی لە رۆژهەڵاتی دەریای ناوەڕاست، لە بەرامبەردا سەردانی تورکیا ناکات.
لە وەڵامی پرسیاری هۆکاری سەردانەکەی ماس بۆ ئەسینا و نیقۆسیا و سەردانی نەکردنی ئەنقەرە، وتەبێژی وەزارەتی دەرەوەی ئەڵمانیا رایگەیاند، "وەزیرى دەرەوە بڕیاری دابوو تەنها سەردانی ئەو دوو شارە بکات و هەر ئەوەش ئەنجام دەدات".
هاوکات، شتیڤن زیبێرت وتەبێژی حکومەتی ئەڵمانیا هۆشداریدایە تورکیا لە سەرلەنوێ دەستکردن بەگەڕان لە ناوچە جێناکۆکەکان لە دورگەکانی یۆناندا و وتى، "بەو پەڕی نیگەرانییەوە ئەم هەنگاوە لە گۆشەنیگای ئێمەوە ژیرانە نییە".
پێشتر هێزە دەریاییەکانی تورکیا رایگەیاند، چالاکییەکانی کەشتی ئوروچ رەیس لە گەڕان بەدوای سەرچاوەکانی وزە لە دەریای ناوەڕاستدا دەستپێدەکاتەوە و ماوەی ١٠ رۆژ دەخایەنێت. هاوکات وەزارەتی دەرەوەی یۆنان ئەم هەنگاوەی تورکیای بە ئاڵۆزترکردنی دۆخەکە و هەڕەشە بۆ سەر ئاشتی و ئاسایشی ناوچە وەسفکرد. رەنگە هەر ئەمەش هۆکاری هەڵوەشاندنەوەی سەردانەکەی وەزیری دەرەوەی ئەڵمانیا بێت بۆ تورکیا.
ئێن ئاڕتی
به‌روار: 13/10/2020
658 جار خوێندراوه‌ته‌وه
|