|
ئوسترالیا سالاَنه 160 هه‌زار كۆچبه‌ر وه‌رده‌گرێت
هەژار تەها
مالمۆکورد
له‌سه‌روبه‌ندی دیاریكردنی واده‌ی هه‌ڵبژاردنه‌كانی ئه‌و وولاَته‌دا، حكومه‌تی هاوپه‌یمانیی ئوسترالیا پلانی بودجه‌ی (دارایی) ساڵی 2019 ی ڕاگه‌یاند كه چه‌ند گۆڕانكارییه‌كی تایبه‌ت به پرسی كۆچبه‌ران و ڤیزای ئوسترالیای له‌خۆگرتووه.
به‌گوێره‌ی پلانه‌كه، حكومه‌تی ئوسترالیا به نیازه سالاَنه و بۆ ماوه‌ی چوار ساڵی داهاتوو كه له ساڵی 2019-2020 ده‌ستپێده‌كات ، 160 هه‌زار كۆچبه‌ر وه‌ربگرێت، ئه‌وه‌ش له كاتێكدایه كه پێشتر ژماره‌ی كۆچبه‌رانی وه‌رگیراو سالاَنه 190 هه‌زار كۆچبه‌ر بووه.
پشكی شێری ئه‌و ژماره‌یه بۆ ئه‌و كۆچبه‌رانه‌یه كه به كۆچبه‌ری شاره‌زا ناسراون و توانای پڕكردنه‌وه‌ی ئه‌و هه‌لی كارانه‌یان هه‌یه كه ئوسترالیا بۆ كۆچبه‌رانی بیانیی ڕایگه‌یاندووه و به‌شه‌كه‌ی تریشی ته‌رخانكراوه بۆ یه‌كگرتنه‌وه‌ی خێزان و مندالاَن.
هاوكات، حكومه‌تی ئوسترالیا بڕیاریداوه به زیادكردنی تێچووی پێشكه‌شكردن بۆ ڤیزای ئه‌و وولاَته به له‌سه‌دا 5.4 له مانگی ته‌مموزی ئه‌مساڵه‌وه ، بۆ هه‌موو ئه‌و ڤیزایانه‌ی كه به ڤیزای (ٍsub-class) ناسراون و خاڵبه‌ندیش بۆ تاقیكردنه‌وه‌ی زمانی ئینگلیزیش به‌جۆرێك ده‌ستكاری ده‌كرێت كه له به‌رژه‌وه‌ندی كۆچبه‌رانه.
شایانی باسه ، پلانی سالاَنه‌ی وه‌رگرتنی كۆچبه‌ران له‌لایه‌ن حكومه‌تی ئوسترالیاوه له‌ڕێگه‌ی پێشكه‌شكردنه‌وه له‌لایه‌ن كۆچبه‌رانه‌وه ئه‌نجام ده‌درێت و كۆچبه‌رانی نایاسایی ناتوانن سودمه‌ندی ئه‌م پڕۆگرامه بن چونكه ئوسترالیا له ئێستادا به‌رده‌وامه له سیاسه‌تی گرتن و دیپۆرتكردنه‌وه‌ی هه‌ر كۆچبه‌رێك یان په‌نابه‌رێك كه بیه‌وێت به قاچاخ و به به‌له‌م ڕوو له ئوسترالیا بكات.
سه‌رچاوه : ماڵپه‌ری هه‌واڵی ئێس بی ئێسی ئوسترالی
به‌روار: 06/04/2019
765 جار خوێندراوه‌ته‌وه
|