|
فۆتۆگرافەرەکەی کۆڕەوی کورد کۆچی دوایی کرد
(سبەی):
ئەو وێنەگرەی لە رێگەی کامێرا و وێنەکانیەوە نەهامەتییەکانی کۆڕەوی کوردی بڵاوکردەوە بەهۆی نەخۆشی شێرپەنجەوە کۆچی دوایی کرد.
یانیس بەهراکیس لە دایکبوی ساڵی (1960)ی ئەسینا بوە لە یۆنان، بەڵام وێنەکانی سنورەکانی جیهانی بڕی و گرنگترین روداوەکانی مێژویی بە کامێراکەی تۆمار کرد و کۆڕەویش یەکێک لەو نەهامەتی و مەینەتییانەی کورد بو کە بەهراکیس تۆماری کردبو.
ئەو فۆتۆگرافەرە بۆ تۆمارکردنی روداوە گرنگ و چارەنوسسازەکانی جیهان خۆی گەیاندوەتەوە بەرەکانی جەنگ و شوێنە کارەساتبارەکان و سات و چرکە هەستیارە مێژوییەکانی تۆمار کردوە کە گرنگترینیان بریتین لە (جەنگی ئەفغانستان، کۆڕەوی کورد لە ساڵی (1991) ئاوارەبونی هەزاران هاوڵاتی کۆسۆڤۆ لە ساڵی (1988) جەنگی چیچان، بومەلەرزەی کشمیر، بەهاری عەرەبی، دۆخی کۆچبەرانی جیهان).
یانیس کە بە یەکێک لە فۆتۆگرافەرە ناودارەکانی (30) ساڵی رابردو ناسراوە، چەندین خەڵاتی نێودەوڵەتی پێبەخشراوە کە گرنگترینیان خەڵاتی باشترین (فۆتۆ جۆرنالیستی جیهانی) بوە.
ئەو فۆتۆگرافەرە کە زۆربەی کارەکانی لە ئاژانسی هەواڵیی رۆیتەرز بڵاو بوەتەوە، دوێنێ یەکشەممە ئاژانسەکە کۆچی دوایی ئەو فۆتۆگرافەرەی بە نەخۆشی شێرپەنجە و لە تەمەنی (58) ساڵیدا راگەیاند.
به‌روار: 06/03/2019
476 جار خوێندراوه‌ته‌وه
|