پزیشكێكی كوردی سوید دڵ دروستدەكات
رووداو - سوێد

پزیشكێكی كوردی سوێدی بە پرۆفیسۆرێكی سوێدی دەڵێت: بەتەمام دڵێكی دەستكرد دروستبكەم. پرۆفیسۆرەكە پێدەكەنێ و دەڵێ: "ئەوەی تۆ دەیڵێی مەحاڵە و بە تۆ ناكرێ". هەمان پزیشك دێتەوە ماڵەوە و باسی دڵە دەستكردەكە لەگەڵ دایكی دەكات. دایكی لە ماڵەكەی خۆیان لە سوێد بەپێكەنینەوە بۆم باسدەكات كە گوتوویەتی :"كوڕی خۆم ئەوەی تۆ باسی دەكەی نابێ. تەنیا خوا دەتوانێ دڵ دروستبكات، تۆ چۆن ئەو شتە دەكەی! بەڵام دواتر دەركەوت كوڕەكەم راستدەكات و قسەی خۆی بردەسەر". 

ئەو گفتوگۆیانە 18 ساڵ لەمەوبەر لەنێوان د.ئازاد نەجاڕ و پرۆفیسۆرە سوێدییەكە و دایكیدا كراون، بەڵام ئێستا كە د.ئازاد دڵەكەی گەیاندووەتە قۆناخی كۆتایی، رۆژێك پرۆفیسۆرەكە هاوكارەكانی كۆكردووەتەوە و لەبەردەم هەموویاندا داوای لێبوردنی لێكردووە.
 
دڵی ئەسكەندەناڤی

لە كۆمپانیای Scandinavian Real Heart و لە نهۆمی سەرەوەی باڵەخانەیەكی شاری پیشەسازیی (ڤێستەرۆس)ی سوێد، د.ئازاد نەجاڕ و هاوكارەكانی سەرقاڵی دوایین ئامادەكارییەكانن بۆ تەواوكردنی پرۆژەی دروستكردنی دڵێكی دەستكرد كە قەبارەكەی هەر هێندەی دڵی ئاساییە و 18 ساڵە كاری تێدا دەكرێت. د.ئازاد بۆ (رووداو)ی باسدەكات كە ئەوەی وەدەستهاتووە بەرهەمی ساڵەها شەونخوونیی خۆی و هاوكارەكانیەتی و بە ملیۆنان یۆرۆی تێچووە. ئێستا كە خەریكە تەواو دەبێت، لە هەندێك وڵاتی جیهانەوە دێن و داوا دەكەن پرۆژەكەیان پێبفرۆشن، بەڵام د.ئازاد ئەمە قبوڵ ناكات و دەوڵەتی سوێدیش گوتوویانە خۆیان هەموو پشتیوانییەكی دەكەن و نایانەوێ بفرۆشرێ. پشتیوانییەكە هێندە گەورەیە كە پادشای سوێد چەند جارێك د.ئازادی بانگهێشت كردووە بۆ ئەوەی پێكەوە نان بخۆن و سەرۆكوەزیرانی سوێدیش بەهەمانشێوە. پزیشكە كوردەكە دەڵێت: "ماڵباتی پاشایەتیی سوێد زۆر جوامێرن و پێیانگوتووم هەموو پشتیوانییەكی پرۆژەكەم دەكەن". ئەو هەرچەندە لایەنی زانستیی دروستكردنی دڵەكەی گەیاندووەتە كۆتایی و بەشی زۆری تاقیكردنەوەكانی تەواو كردووە، بەڵام وەك خۆی دەڵێت بۆ ئەوەی بەرهەمێكی وا هەستیار بكەوێتە بەردەستی خەڵك، دەبێ بە كۆمەڵێك رێوشوێنی یاسایی و كارگێڕیدا تێپەڕێت و ئەو قۆناخانەش ببڕێ. د.ئازاد بە دڵخۆشییەوە دەڵێ: "زۆری نەماوە و چیدیكە نەخۆشییەكانی دڵ و جەڵتەی دڵ ناتوانن گیانی ئەو هەموو مرۆڤە لە جیهاندا بستێنن".

لە زاخۆوە بۆ ڤێستەرۆس

د.ئازاد نەجاڕ خەڵكی شاری زاخۆی باشووری كوردستانە. زۆر منداڵ بووە كە بەهۆی چالاكییە سیاسییەكانی باوكیەوە لە زاخۆوە بە ماڵباتەوە دوورخراونەتەوە بۆ بەغدا. باوكی یەكێك لە پارێزەرە ناسراوەكانی زاخۆ و مووسڵ بووە و بەشداریی سیاسیی لە شۆڕشی كوردستاندا كردووە: "كە چووینە بەغدا، لە دەرەوە دەبووایە بە عەرەبی قسە بكەین، بەڵام لەماڵەوە بۆمان نەبوو بەهیچ شێوەیەك جگە لە كوردی بە زمانێكی دیكە قسە بكەین". ساڵانی دواتر د.ئازاد لە زانكۆی مووسڵ  بڕوانامەی پزیشكی وەردەگرێ و دەبێتە یەكەمی سەر ئاستی زانكۆكەش. لە ساڵانی نەوەتدا پزیشكە كوردەكە بڕیار دەدات بێتە سوێد و لەوێ درێژە بە كاری پزیشكی دەدات، بەڵام وەك خۆی دەڵێت هەمیشە ئارەزووی لەوە بووە شتی زۆرتر لەبارەی دڵەوە بزانێت. بۆیە چوار ساڵ دوای چوونی بۆ ئەو وڵاتە، دەست بە پرۆژەی دروستكردنی دڵی دەستكرد دەكات.

ماڵباتی زیرەك

د.ئازاد كوڕی دایكوباوكێكی خوێندەوارە كە ئێستا تەمەنیان لەسەرووی نەوەت ساڵە و لەژیاندا ماون. بەرهەمی ئەو ژیانە هاوبەشەشیان نۆ منداڵن كە هەموویان كەسانی سەركەوتوو و ناسراون. بۆ نموونە یەكێك لە براكانی پرۆفیسۆرێكی پسپۆڕی مێشكە و یەكێك لە ناسراوترین زاناكانی بوارەكەی خۆیەتی لە سوێد. باوكی د.ئازاد دەڵێت كاتی خۆی كە گەنج بووە ویستوویانە كچی خزمی خۆی لە زاخۆ بۆ بهێنن، بەڵام ئەو بەپێكەنینەوە وەڵامی ماڵباتی خۆی داوەتەوە و گوتوویەتی: "ئەو كچە ناهێنم، چونكە ماڵی ئەوان زیرەك نین و دوایی منداڵەكانی منیش زیرەك دەرناچن". ئەو ئاماژە بۆ دایكی د.ئازاد دەكات كە كچی خاڵیەتی و دەڵێت: "من نازداری خۆمم هەڵبژاردبوو!". دایكی د.ئازادیش پەسنی منداڵەكانی دەدات و دەڵێت: "منداڵی من هەموویان زۆر زیرەكن و سەری ئێمەیان بەرزكردووەتەوە"، دەربارەی د.ئازادیش دەڵێت :"بە منداڵیش هەر وا بوو. ئەو شتانەی دەیكرد لە تەمەنی خۆی گەورەتر بوو". 

د.ئازاد لە باوكی دەپرسێ :"متمانەت بە من هەبوو كە دڵی دەستكرد دروست بكەم؟"، باوكی وەڵامی دەداتەوە: "هەرچییەك تۆ بیكەی، متمانەم پێ هەیە كە سەركەوتوو دەبێ". د.ئازاد بۆم باسدەكات كە ئەو پشتیوانی و هاندان و پەسندانەی دایكوباوكی وایكردووە هەمیشە لە ژیانیدا هەوڵبدات زیرەكترین و باشترین بێت :"چونكە نەمدەویست قسەی دایكوباوكم بشكێ و رۆژێك شەرمەزاریان بكەم".

پرۆژەی گەورەتر

د.ئازاد زۆر دڵخۆشە كە پرۆژەی تەمەنی ئەنجامی هەبووە و دەتوانێ خزمەتی مرۆڤایەتیی پێبكات، بەڵام ئامێرێكی دیكەم پیشاندەدات و دەڵێت: "ئەمە شتێكی گەورەترە لە پرۆژەی دڵی دەستكرد. ئەگەر ئەمە تەواوبێت دەبێتە شۆڕشێك لە بواری تەندروستیی مرۆڤدا و دەتوانین هەم تێڕوانینێكی نوێ بۆ شێوازی كاركردنی دڵ دروستبكەین كە تەواو جیاوازە لەوەی تاوەكو ئێستا زانایان پێیگەیشتوون. واشدەكات رێگە لە دروستبوونی زۆر نەخۆشیی ترسناك لە مرۆڤدا بگرێت". 

ئەو پزیشكە كوردە دەڵێت: "تا من لە پرۆژەی دڵی دەستكردەكەمدا بمێنم، وادەكەم نەخۆشەكانی كوردستان بە ئاسانترین شێوە دەستیان بگاتە ئەو دڵە و زۆرترین نەخۆشی پێ رزگار بكەین، بەڵام كێشە تەنیا دڵەكە نییە و دەبێ ژێرخانی تەندروستیشی بۆ بگونجێنین. بۆ نموونە كەسی تایبەت هەبن كە راهێنانیان كردبێ و بتوانن كاتێك كێشەیەك هەبوو، هاوكاریی هەڵگری دڵە دەستكردەكان بكەن، بەڵام ئەوەی لەسەر من بێت هەموو شتێك دەكەم بۆ میللەتی خۆم".

* بۆ زانیاریی زۆرتر لەسەر د. ئازاد نەجاڕ، بەرنامەی (بیگ ستۆری)ی تەلەڤیزیۆنی رووداو ببینە كە شەوی چوارشەممە كاژێر 22:00 بە كاتی كوردستان پەخش دەكرێت.
 
به‌روار:  20/01/2019
250   جار خوێندراوه‌ته‌وه
  بابه‌تی زیاتر ...
نەوا دوای گەڕان بۆ ماوەی چارەكە سەدەیەك بەدوای پیاوێكدا، كچێكی كوردی پەنابەر لەكۆتاییدا بەئاواتەكەی گەیشت و ئەو كەسەی دۆزییەوە، كە بەمنداڵی ژیانی گۆڕیبو. سەرچاوەكانی هەواڵی جیهان درێژه‌ ...
خەڵك – بەشی هەواڵ ئەندامێكی لیژنەی كشتوكاڵ، لە پەڕلەمانی كوردستان دەڵێت: سەردانی كێڵگە كستوكاڵییەكانی قەزای پێنجوێنمان كردووە و پاش لێكۆڵینەوە بۆمان دەركەوت كە شوتی درێژه‌ ...
سبەی): ئامۆزایەکی بەشار ئەسەدی سەرۆکی سوریا دەڵێت: نازناوی عه‌لی ئه‌سه‌دی باپیریان "وەحشە" و بۆ ئەو مەبەستەش ناسنامەکەی بڵاوکردوەتەوە. فیراس ئه‌سه‌د، ئامۆزا و نه‌یاری به‌شار ئه درێژه‌ ...
دۆناڵد ترامپ سەرۆکی ئەمریکا بیرۆکەی کڕینی گرینلاند زیندوو دەکاتەوە و لێپرسراوانی دانیمارکیش رەخنە لە بیرۆکەکەی ترامپ دەگرن و بە بێ بنەما ناوی دەبەن. ئەمڕۆ رۆژی هەینی، رۆژنامەی " درێژه‌ ...
Li gor amarên zanîngeha Uppsalayê, nisbeta kesên ku di kursa zimanê kurdî de serketî bûne barçav zêdetir bûye. Di sala 2015-ê de, 19% yê xwandekaran kurs temam kiribû. Par nisbe درێژه‌ ...
. ژاپۆن ڤیزای دبلۆماسیی، داوەتننامەی خوێندن، مرۆیی بە هاوڵاتیانی هەرێم و عیراق دەدات و لە 20ی ئەم مانگەوە دەست بە وەرگرتنی داواكارییەكانی بۆ پێدانی ڤیزا دەكات لە را درێژه‌ ...
لێشاوی سه‌ردانی هاووڵاتییانى هه‌رێمى كوردستان بۆ توركیا به‌مه‌به‌ستى گه‌شتوگوزار یان چاره‌سه‌رى پزیشكى یان خوێندن، به‌رده‌وامه‌. له‌گه‌ڵ ئه‌وه‌یشدا حكوومه‌تى توركیا و ئیداره‌ى فڕۆك درێژه‌ ...
"هەروەک چۆن تەقینەوەی پارچەکانی ئەتۆم وزەیەکی زۆر گەورەی لێدەکەویتەوە، ئەو فیشەکەی یەکەم، کاریگەریەکی هاوشێوەی هەبوو، ئەوەی لەو فیشەکەدا کۆبووبوه‌وە، ئەو کینە گەورەیەیە لە بەرامبەر درێژه‌ ...
خەندان- چەند سەرچاوەیەکی هەواڵی سوریا رایدەگەیەنن، ئەمریکا "ژێر بە ژێر لەگەڵ تورکیادا رێککەوتوە" و بە نیازی ئەنجامدانی کودەتایە بەسەر کوردەکانی سوریادا. بەگوێرەی زانیاریەک درێژه‌ ...
خەندان- تیمی پەرەپێدەری كۆمپانیای گوگڵ لە بروسکەیەکدا بڕوانامەی سوپاسگوزاریان بەخشیە گەنجێكی كوردی خەڵكی هەڵەبجە، بەهۆی كاركردنی بۆ ماوەی 8 ساڵ و چەسپاندنی زمانی كوردی و وەرگێڕا درێژه‌ ...
ژماره‌ی بابه‌ت
مافەکان پارێزراوە بۆ مالمۆکورد
میوانی سه‌رهێڵ:   161
کۆی سه‌ردان:   18150437