|
زەنگیانەی ئاویی ڕستی حەوتەم
( تۆ و مانگ )
گەر دەپرسیت
ئەمن جوانم یاوەکو مانگ ؟
درۆ بە زارمدا نایەت
تۆ دەبینم، مانگم لەبیر دەچێتەوە
مانگ دەبینم
ئەتۆم بەبیردێنێتەوە.
( کێ دەڵێت .. کێ )
پێش ئەوەی مۆسیقایەك، تەواو بێ
پڕ بەدڵی خۆم سەما دەکەم،
دی خۆم ئاوێزانی، گۆرانییەك دەکەم
کە رۆحم ئاسودە دەکا..
کێ دەڵێ سبەی گوێبیستی
مۆسیقا و گۆرانی دەبم .. كێ ؟
( روبار )
ببمە دەریا
جۆگە
لە روبار یاخی دەبێ
روباریش لە من،
مەگەر ئەشکی خۆم
ببتە روبار و تێیبڕژێ..
( لەشکری خەم )
سەرلەشکری سوپایەك بم
لە دنیادا سوپا نەبێ
شان بدات لە شانی
لەشکری خەم
هێرشم بۆ بێنێ،
پێویستم بە هاوڕێیەك دەبێ
سەر بخەمە سەر شانی و
پڕ بەدڵی خۆمبۆ خۆم بگریم .
( پێکەنین )
نەفرەت لە من ..
چەند بەدفەڕم
پێکەنینی خۆم بەپولێك دەفرۆشم
تا لەتەك تۆدا بگرێم.
ئەتۆش .. ئا، ئەتۆش
پێکەنینت بەئەقڵم دێ
هەقی خۆتە .. ئەمن گێلم
کە ئەو سەودایە دەکەم
نەفرەت لە من.
( کەنار دەریا )
ئێجگار ماندووم
پێویستم،
بە پشویەکی درێژە
لە کەنار دەریا نا
لەسەر سینەی تۆ.
فەتاح حەسەن
دانیمارك/ ڤالبی
2017
به‌روار: 21/09/2018
479 جار خوێندراوه‌ته‌وه
|