ئه‌و پرسیارانه‌ی له‌م كاته‌دا چاوه‌رێی وه‌ڵامن
عیماد عەلی
له‌م كاته‌دا كه پرسی ده‌ستور و تێپه‌راندنی هاتۆته ئاراوه، زۆرێك پرسیار هه‌ن و گومان دروست ده‌كه‌ن و چاوه‌رێی وه‌ڵامن، یان تۆ بڵێی ماوه‌یه‌كی تر و پاش كۆتاییهاتنی ماوه‌ی سه‌رۆكی هه‌رێم و دۆزینه‌وه‌ی چاره‌سه‌رێك له ده‌رئه‌نجامی سازانی لایه‌نه‌كان، وه‌ڵامه‌كان به خۆیان ده‌ربكه‌ون ؟ :
1- بۆچی پرسی ده‌ستور به‌تایبه‌تی له‌م كاته‌دا هاتۆته ئاراوه و په‌رله‌مان له ماوه‌ی پێشودا بێده‌نگی لێ كرد ؟
2- بۆچی ئۆپۆزسیۆنی ئه‌وسا و ده‌سه‌لاتی ئه‌مرۆ له‌و ماوه‌یه‌دا بێده‌نك بوون و ئێستا وا چونه‌ته ژێر بار و ئه‌وان زیاتر جه‌خت له‌سه‌ر ئه‌م بابه‌ته ده‌كه‌نه‌وه ؟
3- بۆچی له كاتێكدا كه ماوه‌ی درێژكردنه‌وه‌ی سه‌رۆكی هه‌رێم به‌ره‌و كۆتایی ده‌چێت، پرسی ده‌ستور هاوته‌ریب باسی لێوه ده‌كرێت و لیجنه‌ی بۆ دروست ده‌كه‌ن و وا نیشانده‌ده‌ن كه ته‌نها به‌مه‌به‌ستی ده‌ستور نه‌ك به‌ناوی ده‌ستوره‌وه تێپه‌راندنی یاسایه‌ك بۆ درێژكردنه‌وه‌ی ماوه‌ی سه‌رۆكی هه‌رێم هاتۆته ئاراوه ؟
4- بۆچی لیجنه بیست و یه‌ك كه‌سیه‌كه خه‌ڵكێكی خاوه‌ن پێشینه‌ی یاسایی پرۆفیشناڵی وه‌ك دكتور نوری تاڵه‌بانی و دكتۆر شێخ له‌تیف و دكتۆر شۆرش و چه‌ندین ئه‌كادیمی و پسپۆری بواری یاسا وده‌ستوری زانكۆكانی كوردستان له خۆ ناگرێت كه پسپۆری تایبه‌تی یاسا و ده‌ستورن ؟
5- بۆچی سازان له‌سه‌ر برگه‌كان له نێوان ئه‌ندامانی لیجنه‌كه‌ی سه‌ر به حزبه‌كانی په‌رله‌مان كراوه‌ته بنه‌مای گفتوگۆ و كۆتابریار كه به‌هیچ شێوه‌یه‌ك رێگه نادات ده‌ستورێكی گونجاوی پڕ و كه‌م كه‌لێن و دیموكراسی بیته ئاراوه ؟
6- بۆچی سه‌رجه‌م ئه‌ندامانی لیجنه‌كه سه‌ر به حزبه‌كان بن و خه‌ڵكی بێلایه‌نی تێدا نه‌بێت ؟
7- بۆچی بۆیان هه‌بێت ماوه‌ی كاری لیجنه‌كه بۆ ماوه‌یه‌كی دیارینه‌كراو درێژ بكه‌نه‌وه، پاش كۆتاییهاتنی سێ مانگه‌كه، كه به‌مه‌ش بواری تێپه‌راندنی ده‌ستور له كاتێكێ پێویستدا نادات و ئه‌گه‌ری دانانی ده‌ستور له كاتی دیاریكراوی خۆیدا زۆر لاواز ده‌بێت و بواری پشتگوێخستنی زۆر فراون ده‌بێت ؟
8- بۆچی هاوشانی كاری لیجنه‌كه رێكخراوه مه‌ده‌نیه‌كان و خه‌ڵكی په‌یوه‌ندیدار سه‌رپشك نه‌كراون له توێژینه‌وه و یارمه‌تیدانی ئه‌و لیجنه‌یه و هیچ كارئاسانیان بۆ نه‌كراوه و پێداویستیه‌كانیان بۆ فه‌راهه‌م نه‌كراوه و داوه‌ت نه‌كراون بۆ یارمه‌تیدانیان ؟
9- بۆچی قه‌یرانی ئابووری رێگر نیه له‌م ماوه زۆر كه‌مه‌دا له‌باره‌ی ده‌ستوره‌وه قسه و باس بكریت ولیجنه‌ی بۆ دروست بكرێت و ئه‌گه‌ری ئه‌وه‌ش له ئارادابێت له‌دواجاردا تێنه‌په‌رێنرێت ؟
- بۆچی بارودۆخی سیاسی ناله‌بار و خۆمه‌ڵاسدانی داعش له نزیكه‌وه رێگر نیه له‌م كاته‌دا له ده‌ست بردن بۆ پرۆسه‌یه‌كی گرنگی چاره‌نوسساز كه پێویستی به هێمنی و سه‌قامگیری سیاسی و ئابوریه‌وه هه‌یه ؟
11- بۆچی سه‌ركرده بریار به‌ده‌سته‌كانی ئاستی یه‌كه‌می حزبه‌كان له‌و لیجنه‌یه‌دا نین كه توانای تێپه‌راندنی برگه هه‌ستیاره‌كانیان هه‌یه، وه‌ك چۆن له ده‌ستوری عیراقدا به‌شدار بوون ؟
12- بۆچی خه‌ڵك متمانه‌ی به‌م حزبانه و په‌رله‌مان و لیجنه‌كه‌ش نیه كارێكی وا به جوانی به‌رێبكه‌ن و ده‌ستورێكی گونجاوی دیموكراسی دانێن كه به‌رژه‌وه‌ندی شه‌خسی و حزبی زاڵ نه‌بێت به‌سه‌ریاندا ؟
به‌روار: 24/05/2015
513 جار خوێندراوه‌ته‌وه